روٹری انٹرنیشنل کی حکومت پاکستان کی جانب سے پولیو کے خاتمے کی کوششوں کی تعریف

وزیراعظم عمران خان نے کہاہے کہ حکومت پولیو وائرس کی روک تھام کیلئے پاک افغان سرحد کے آرپارنقل وحرکت باضابطہ بنانے کیلئے خصوصی اقدامات کررہی ہے۔انہوں نے یہ بات روٹری انٹرنیشنل کے اعلیٰ سطح کے ایک وفد سے گفتگوکرتے ہوئے کہی جس نے تنظیم کے صدرHolger Knaak کی سربراہی میں اُن سے اسلام آباد میں ملاقات کی۔ملاقات میں پولیو کی موجودہ صورتحال اوراس کے خاتمے کیلئے حکومت کی جانب سے کئے گئے اقدامات پرتبادلہ خیال کیاگیا۔صحت کے بارے میں وزیراعظم کے معاون خصوصی ڈاکٹرظفرمرزانے ملاقات میں شرکاء کو بریفنگ دیتے ہوئے کہاکہ پولیو کے خاتمے کی حالیہ مہم میں ایک لاکھ سے زائدسیکیورٹی اہلکار اور اڑھائی لاکھ سے زائدپولیو ورکرزشریک ہوئے جس کے دوران پانچ سال سے کم عمرکے تقریباً چارکروڑبچوں کوپولیو سے بچائو کے قطرے پلائے گئے۔پاکستان میں پولیو کے خاتمے کے سلسلے میں تمام بین الاقوامی تنظیموں خصوصاً روٹری انٹرنیشنل کے تعاون کوسراہتے ہوئے وزیراعظم نے کہاکہ حکومت اس طرح کی تنظیموں کوانتہائی قدر کی نگاہ سے دیکھتی ہے اور اُن کی خدمات کی ادائیگی میں تمام ممکنہ معاونت کرے گی۔وفد نے حکومت پاکستان کی جانب سے پولیو کے خاتمے کی کوششوں کی تعریف کی۔