انڈین پریمیئر لیگ 13 ویں سیزن کا شیڈول جاری

نئی دہلی، بے شمارانعامی دولت سے مالامال انڈین پریمیئر لیگ (آئی پی ایل) کے 13 ویں سیزن کا افتتاحی مقابلہ 29 مارچ کو ممبئی کے وانکھیڈے اسٹیڈیم میں گزشتہ چمپئن ممبئی انڈینس اور چنئی سپر کنگز کے درمیان کھیلا جائے گا اور اس بار ٹورنامنٹ میں ہفتہ کو کوئی ڈبل ہیڈر نہیں ہوگا۔روہت شرما کی کپتانی والی ممبئی انڈینس نے گزشتہ سیزن میں مہندر سنگھ دھونی کی کپتانی والی چنئی سپر کنگز کو ہرا کر چوتھی بار خطاب پر اپنا قبضہ کیا تھا۔ ٹورنامنٹ کا اس بار کا پروگرام جاری کر دیا گیا ہے ۔ اگرچہ ٹورنامنٹ کا ناک آؤٹ مرحلہ کا ابھی اعلان نہیں کیا گیا ہے ۔ لیگ مرحلے کا آخری میچ بنگلور میں رائل چیلنجرز بنگلور اور ممبئی انڈینس کے درمیان 17 مئی کو کھیلا جائے گا۔ہفتہ کو ڈبل ہیڈر ختم کئے جانے سے اس بار ٹورنامنٹ ایک ہفتے بڑھ گیا ہے ۔ پچھلی بار یہ 44 دن تک چلا تھا لیکن اس بار یہ 50 دنوں تک چلے گا۔ اس سیزن میں صرف اتوار کے دن ہی دو میچ کھیلے جائیں گے ۔ ٹورنامنٹ میں چھ ڈبل ہیڈر ہوں گے جو اتوار کو کھیلے جائیں گے ۔لیگ مرحلے میں میچوں کا وقت رات 8 بجے ہوگا ۔ اتوار کو ڈبل ہیڈر میچ کا ایک وقت شام 4 بجے رہے گا۔ لیگ راؤنڈ میں تمام ٹیموں کے درمیان 56 میچ کھیلے جائیں گے اور لیگ مرحلے کا اختتام 17 مئی کو ہوگا۔ آئی پی ایل کا فائنل میچ 24 مئی کو کھیلا جائے گا۔ٹورنامنٹ کی آٹھ ٹیموں میں صرف راجستھان رائلس ہی ایسی ٹیم ہے جس نے گوہاٹی کو اپنا دوسرا گھر بنایا ہے جبکہ سات دیگر ٹیمیں اپنے باقاعدہ گھریلو سائٹ پر ہی اپنے میچ کھیلیں گی۔اگرچہ لوڈھا کمیٹی نے سفارش کی تھی کہ ہندستان کے آخری بین الاقوامی میچ اور آئی پی ایل کے افتتاحی مقابلے کے بیچ 15 دنوں کا فرق ہونا چاہئے لیکن ٹورنامنٹ ہندستان اور جنوبی افریقہ کے درمیان 18 مارچ کو کولکتہ میں تین میچوں کی سیریز ختم ہونے کے 11 دن بعد ہی شروع ہو رہا ہے ۔آئی پی ایل کی کئی ٹیموں نے اپنے سرکاری ٹوئٹ ہینڈل سے اپنے میچوں کا پروگرام بھی جاری کیا ہے ۔ اس بار آئی پی ایل میں کچھ نئے قوانین بھی دیکھنے کو ملیں گے ۔ انڈین پریمیئر لیگ 2020 سیزن میں کنکشن سبسٹي ٹیوٹ قوانین لاگو کیا جائے گا۔ یعنی اگر کسی کھلاڑی کو بلے بازی یا گیند بازی کے دوران سر میں چوٹ لگ جاتی ہے تو وہ میچ سے باہر جا سکتا اور اس کی جگہ پر کوئی اور کھلاڑی میچ میں آ سکتا ہے ۔ اس کے علاوہ فرنٹ فٹ نوبال پر اضافی امپائر نظر رکھے گا۔