qurishi

آج بھارت میں ریپبلک ڈے کی پریڈ میں ٹینک نہیں ٹریکٹر نظر آرہے ہیں،وزیر خارجہ

ویب ڈیسک(اسلام آباد ): وزیر خارجہ شاہ محمود قریشی کا کہنا ہے کہ بھارت میں جمہوریت کی بجائے کالے قوانین کا نفاذ ہو رہا ہے، مودی سرکار کی منفی پالیسیوں سے بھارت کی معاشی صورتحال بگڑچکی ہے۔

تفصیلات کے مطابق وزیر خارجہ شاہ محمود قریشی نے بھارتی یوم جمہوریہ کےحوالے سے اپنے بیان میں کہا ہے کہ آج بھارت کا یوم جمہوریہ یومِ سیاہ کے طور پر منایا جا رہا ہے ، آئین کے تحت کشمیریوں کو دیا گیا تشخص چھین لیا گیا ہے ، بنیادی آئینی حقوق سلب کر لیے گئے کشمیری سراپااحتجاج ہیں اور عالمی میڈیا،انسانی حقوق کی تنظیمیں بھارتی مظالم کاپردہ چاک کر رہی ہیں۔

مزید پڑھیں:  ججز کا خط: پاکستان بار کونسل کا تحقیقاتی کمیٹی تشکیل دینے کا مطالبہ

شاہ محمود قریشی کا کہنا تھا کہ آج بھارت میں یوم جمہوریہ کی پریڈ میں ٹینک نہیں ٹریکٹرنظرآرہےہیں، آج دلی کی طرف ہندوستان کے کسان مارچ کررہے ہیں۔

وزیر خارجہ نے کہا کہ بھارتی سرکار کی منفی پالیسیوں سےبھارت کی معاشی صورتحال بگڑچکی ہے، بھارت میں آج اقلیتیں خود کو غیر محفوظ محسوس کر رہی ہیں، آج بھارت میں مسلمان،بنگالی، دلت کوئی محفوظ نہیں۔

مزید پڑھیں:  خیبرپختونخوا :سینیٹ کی 11نشستوں پر 42امیدواروں کے کاغذات جمع

ان کا کہنا تھا کہ بھارت میں جمہوریت کی بجائے کالے قوانین کا نفاذ ہو رہا ہے، آج بھارت میں سیکولرازم دبتا اور ہندوتوا ابھرتی دکھائی دے رہی ہے۔

شاہ محمود قریشی نے مزید کہا کہ بھارت کے رویے سے اس کے سارے پڑوسی نالاں ہیں، نیپال،چین،بنگلہ دیش سب کےساتھ بھارت کارویہ بدلاہواہے، بھارت کے رویے کے باعث تیزی سے پڑوسی ممالک سےدور ہورہا ہے۔