news 1592835492 8124

وزیر صحت خیبرپختونخوا نے جولائی تک 30 لاکھ افراد کی کورونا ویکسینیشن کرنے کی نوید سنادی

ویب ڈیسک (پشاور) خیبرپختونخوا میں فرنٹ لائن ورکرز کو کورونا سے بچاؤ کی ویکسی نیشن میں تیزی آنے لگی ہے اور صوبے میں اب تک مجموعی طور پر 16595 طبی اہلکاروں کو ویکسین دی جا چکی ہے۔

وزیر صحت خیبر پختونخوا تیمور سلیم جھگڑا کے مطابق صوبے کے تمام اضلاع میں کورونا سے بچاؤ کی ویکسی نیشن شروع کر دی گئی ہے،صحت کے شعبے سے منسلک عملے کی ویکسی نیشن کے لیے صوبے میں 100 سے زائد سینٹرز فعال ہیں۔

گزشتہ 24 گھنٹوں میں مزید 2855 ہیلتھ ورکرز کو کورونا سے بچاؤ کی ویکسین دی گئی ہے۔ اس طرح صوبے میں اب تک مجموعی طور پر 16 ہزار 595 طبی اہلکاروں کو ویکسین دی جا چکی ہے۔ جن فرنٹ لائن ورکرز کو کورونا سے بچاؤ کی پہلی ڈوز لگائی گئی تھی اب بیس روز کے بعد دوسری ڈوز شروع کردی گئی ہے۔

مزید پڑھیں:  پشاور، ملک طارق اعوان کی کامران بنگش کیخلاف قانونی کارروائی

صوبائی دارالحکومت پشاور میں اب تک مجموعی طور پر 4848 ورکرز کو ویکسین دی گئی ہے۔ اس کے علاوہ ایبٹ آباد میں 1522، سوات 861، لوئر دیر 727 ، کوہاٹ میں 463، شانگلہ میں 357، باجوڑ میں 248 اور چترال میں 227 ہیلتھ ورکرز کورونا سے بچاؤ کی ویکسین لے چکے ہیں۔

مزید پڑھیں:  واشنگٹن، اسرائیل میں انتخابات اور قیادت کی تبدیلی پر زور بڑھنے لگا

صوبائی وزیر صحت کا کہنا ہے صوبے میں 65 سال سے زائد العمر افراد کی ویکسی نیشن مارچ کے دوسرے ہفتے میں شروع کی جائے گی، جس کے لئے محکمہ صحت نے تمام تر تیاری مکمل کرلی ہے۔ صوبے میں عام افراد کے لئے یکم جولائی سے کورونا سے بچاؤ کی ویکسین دستیاب ہوگی۔