ویب ڈیسک(اسلام آباد) ڈرگ ریگولیٹری اتھارٹی آف پاکستان (ڈریپ) نے ملک میں دو کورونا ویکسینوں کو 60 سال سے زائد عمر کے افراد کو لگانے کی اجازت دے دی ہے۔
ذرائع کے مطابق ڈریپ کی جانب سے جن ویکسینوں کے استعمال کی اجازت دی گئی ہے ان میں چین کی تیار کردہ ویکسین سائنو فارم اور روس کی تیارکردہ ویکسین اسپوٹنک وی شامل ہیں۔
ڈریپ کی منظوری کے بعد پاکستان کے ایسے تمام شہریوں کو عالمی وبا قرار دیے جانے والے کورونا وائرس سے بچاؤ کے لیے ویکسین لگائی جا سکے گی جن کی عمریں 60 سال سے زائد ہیں۔
ڈریپ نے ہدایت دی ہے کہ اس بات کو یقینی بنایا جائے کہ ویکسین لگنے کے بعد 60 سال سے زائد العمر افراد دو دن تک ویکسینیشن سینٹر ہی میں قیام کریں تاکہ انہیں مانیٹر کیا جا سکے۔