وزیر خارجہ شاہ محمود قریشی تین روزہ دورے پر ترکی روانہ

ویب ڈیسک (اسلام آباد )وزیر خارجہ مخدوم شاہ محمود قریشی ترک ہم منصب میولوت چاوش اوغلو کی دعوت پر انطالیہ سفارتی فورم کے اجلاس میں شرکت کے لئے تین روزہ دورے پر ترکی روانہ ہو گئے ۔

وزیر خارجہ ایشیامیں علاقائی تعاون کے عنوان سے پینل مذاکرے میں خطے کے دیگر وزرا خارجہ کے ہمراہ شرکت کریں گے

وزیر خارجہ انطالیہ سفارتی فورم اجلاس میں، علاقائی تعاون، معاشی ترقی اور رابطوں کی استواری کے حوالے سے پاکستان کا نکتہ نظر اجاگر کریں گے۔انطالیہ سفارتی فورم کے اجلاس کے موقع پر وزیر خارجہ کلیدی وزرائے خارجہ کے ساتھ دوطرفہ ملاقاتیں کریں گے اور باہمی دلچسپی کے علاقائی و عالمی امور پر تبادلہ خیال کریں گے۔

انطالیہ سفارتی فورم میں اعلی سطحی سیاسی رہنما، سفارت کار، مفکرین اور محقیقین شرکت کررہے ہیں۔ فورم کا موضوع تخلیقی سفارت کاری: نیا دور، نیا اندازفکررکھا گیا ہے۔ پاکستان تجارت، رابطوں کی استواری اور معاشی ترقی میں شراکت داری کا حامی ہے اور علاقائی اشتراک عمل اور کثیرالقومی تعاون کے ایجنڈے سے اتفاق کرتا ہے۔