طارق ملک نیشنل ڈیٹا بیس اینڈ رجسٹریشن اتھارٹی کےنئے سربراہ مقرر، نوٹیفکیشن جاری

ویب ڈیسک(اسلام آباد) نیشنل ڈیٹا بیس اینڈ رجسٹریشن اتھارٹی کے نئے سربراہ کا تقرر کر دیا گیا، وزارت داخلہ نے طارق ملک کی بطور چیئرمین نادرا تعیناتی کا نوٹیفکیشن جاری کر دیا۔

وفاقی وزیر داخلہ کی جانب سے چیئرمین نادرا کی تعیناتی کا نوٹیفکیشن نادرا آرڈیننس 2002 کے تحت جاری کیا گیا، نوٹیفکیشن کے مطابق طارق ملک کو تین سال کے لئے نیشنل ڈیٹا بیس اینڈ رجسٹریشن اتھارٹی کا سربراہ مقرر کیا گیا ہے۔ حکومت نے 8 جون کو طارق ملک کو چیئرمین نادرا تعینات کرنے کی منظوری دی تھی۔

واضح رہے طارق ملک پیپلز پارٹی کے دورحکومت میں بھی نادرا کے سربراہ کی حیثیت سے خدمات سرانجام دے چکے ہیں تاہم مسلم لیگ (ن) کے دور میں اس وقت کے وزیر داخلہ چوہدری نثار علی خان سے اختلافات کے باعث انہوں نے چیئرمین نادرا کا عہدہ چھوڑ دیا تھا۔