موسیقی کا عالمی دن آج منایا جارہا ہے

ویب ڈیسک (کراچی)21 جون، پاکستان سمیت دنیا بھر میں آج موسیقی کا دن منایا جا رہا ہے،یہ دن منانے کا مقصد لوگوں کو موسیقی کے ذریعے امن، محبت اور بھائی چارے کو عام کرنے کا پیغام دینا ہے۔

میوزک ڈے کا آغاز 1981 میں فرانس کے شہر پیرس سے ہوا اور آہستہ آہستہ یہ دن پوری دنیا میں منایا جانے لگا۔

برِصغیر میں موسیقی نے مغلیہ دور سے بہت پہلے عروج حاصل کر لیا تھا، امیرخسرو کے بعد تان سین اور بیجوباورا، کے ایل سہگل اور مختار بیگم سے ماضی قریب تک سینکڑوں کلاسیک گائیک اس فن کے امین بنے۔ قیام پاکستان کے بعد موسیقی کے شعبہ میں نصرت فتح علی خان، نور جہاں، مہدی حسن، فریدہ خانم، اقبال بانو، خورشید بیگم، غلام علی، پرویز مہدی، احمد رشدی اور مسعود رانا جیسے ناموں نے لازوال گیت تخلیق کیے اور گائے۔

فوک موسیقی میں عالم لوہار، شوکت علی، ریشماں، پٹھانے خان، عابدہ پروین، سائیں اختر، عارف لوہار اور دیگر نے اس فن کو بام عروج پر پہنچایا- موسیقی کی ایک اور جہت قوالی بھی ہے جس کا سب سے درخشاں ستارہ استاد نصرت فتح علی خان ہیں، غلام فرید صابری اور عزیز میاں سمیت کئی دوسرے قوالوں نے بھی اپنی گائیکی سے دنیا بھر میں اپنے مداح پیدا کیے۔موجودہ دور میں پوپ موسیقی میں علی ظفر، عاطف اسلم، عمیر جسوال اور مومنہ مستحسن وغیرہ مقبول نام ہیں