ویب ڈیسک: سابق ممبر صوبائی اسمبلی شازیہ اورنگزیب نے عوامی نیشنل پارٹی سے مستعفی ہوکر مسلم لیگ ن میں شمولیت کا فیصلہ کیاہے ۔مشرق ٹی وی سے گفتگو کرتے ہوئے شازیہ اورنگ زیب نے کہا کہ عوامی نیشنل پارٹی کی موجودہ صوبائی قیادت میں سیاسی بصیرت کی کمی ہے۔
اے این پی کا موجودہ سیاسی رول افسوس ناک ہے اور کمزور سیاست کررہی ہے جس کا فائدہ حکمران جماعت پاکستان تحریک انصاف کو ہورہا ہے،اے این پی اندرونی اختلافات کا شکار ہے اور قیادت کی سیاسی سرد مہری کے ساتھ متحرک کارکنوں کا پارٹی میں رہنا مشکل ہے اس لئے سوچ بچار اور مشاورت کے بعد مسلم لیگ ن میں شمولیت کا فیصلہ کرلیا۔
انہوں نے کہا کہ ملک کو موجودہ سیاسی اور معاشی بحران سے صرف مسلم لیگ ن ہی نکال سکتی ہے ، شازیہ اورنگ زیب کی پارٹی چھوڑنے اور اے این پی پر تنقید کرنے پر صوبائی جنرل سیکرٹری سردار حسین بابک نے مشرق ٹی وی کو بتایاکہ جمہوریت میں ہر انسان اپنے فیصلوں میں آزاد ہے ، اگر کوئی اپنی سیاسی جماعت بناناچاہے، کسی پارٹی میں شامل ہوناچاہے یا چھوڑنا چاہے تو اس میں کوئی قباحت نہیں۔
یہ ایک جمہوری عمل اور ہر ایک کا حق ہے انہوں نے کہا کہ ہم سیاسی لوگ ہیں اور تنقید کو اچھی نظر سے دیکھتے ہیں۔ اگر ہم پر کوئی تنقید کرتاہے تو ہم خوش ہوتے ہیں اورکوشش کرتے ہیں کہ وہ غلطیاں یا کوتاہیاں نکالے ۔
