ویب ڈیسک: صوبائی اسمبلی میں توہین قرآن اور عائلی قوانین سے متعلق الگ الگ قراردادیں منظور کر لی گئیں ہیں جبکہ عوامی مسائل کی نشاندہی پر مبنی 2 تحاریک التوا کو بھی بحث کیلئے منظور کر لیا گیا ہے ۔
پہلی قرارداد اسمبلی فلور پر ایم پی اے سردار اورنگزیب نلوٹھا نے ایبٹ آباد میں قرآن پاک کی توہین کے واقعات کے خلاف پیش کی اور اس قرارداد کو متفقہ طور پر اسمبلی کے ممبران سے منظور کرالیا گیا ،اس قرارداد پر اسمبلی کے سپیکر مشتاق احمد غنی نے بھی بحث میں حصہ لیتے ہوئے افسوس کا اظہار کیا کہ ایبٹ آباد میں قران پاک کی توہین کے واقعات تشویشناک ہیں اس لئے ان واقعات سے متعلق اعلی سطحی تحقیق ہونی چاہئے ،
دریں اثنا ایم پی اے بابر سلیم سواتی نے عائلی قوانین کے تحت نکاح نامہ میں ختم نبوت کا حلف نامہ شامل کرنے کی قرارداد اسمبلی کے فلور پر پیش کی جس کو بھاری اکثریت کے ساتھ ممبران سے منظور کرالیا گیا ہے ۔