کرکٹ کا بہترین انفراسٹرکچر

کرکٹ کا بہترین انفراسٹرکچر بنانا 2022 میں ترجیح ہوگی

چیئرمین پاکستان کرکٹ بورڈ رمیز راجہ نے کہا ہے کہ ایج گروپ کے باصلاحیت کھلاڑیوں کو پاتھ وے اور ملک میں کرکٹ کا بہترین انفراسٹرکچر بنانا سال 2022 میں میری ترجیح ہوگی ۔

اپنے بیان میں انہوں نے کہا کہ آپ سب کو میری طرف سے نیا سال بہت بہت مبارک ہو،دعا ہے کہ 2022 قومی کرکٹ ٹیم کے لیے نئی خوشیاں لائیں۔انہوں نے کہا کہ کپتان کو بااختیار کرنے سے قومی کرکٹ ٹیم کی کارکردگی میں تسلسل آیا۔ انہوں نے کہا کہ ایج گروپ کرکٹ میں حصہ لینے والے باصلاحیت کھلاڑیوں کو پاتھ وے اور ملک میں کرکٹ کا بہترین انفراسٹرکچر بنانا سال 2022 میں میری ترجیح ہوگی ۔ایج گروپ کرکٹرز کو وظیفہ اور مسابقتی کرکٹ دینے کا فیصلہ کیا ہے ۔ انہوں نے مزید کہا کہ انڈر 19 اور ویمنز پی ایس ایل کے لیے کام کررہے ہیں ،پاکستان میں ٹی ٹین کرکٹ ٹورنامنٹ کروانے پر بھی غور کیا جاسکتا ہے۔ ڈراپ ان اور ہائبرڈ پچز پر تیزی سے کام کررہے ہیں ،اسلام آباد میں اسٹیڈیم اور ہائی پرفارمنس سینٹر میں نئے کمرے بنانے پر توجہ مرکوز ہے ۔

یہ بھی پڑھیں:سفر کا آغاز نہیں ،اختتام معنی رکھتا ہے

رمیز راجہ نے کہا کہ قومی کرکٹ ٹیم کے کوچز کی تقرری پر کپتان بابر اعظم، محمد رضوان اور ثقلین مشتاق سے بات ہوئی ہے،عام تاثر یہی ہے کہ قومی ٹیم کے ساتھ غیرملکی کوچز کی تقرری ہونی چاہیے۔ انہوں نے کہا کہ فینز قومی کرکٹ کا اثاثہ ہیں، انہیں ہر ممکن سہولیات دیں گے، سال 2022 پاکستان کرکٹ فینز کے لیے بمپر سال ہے ۔ رواں سال بڑی ٹیمیں پاکستان آئیں گی،پرامید ہیں کہ کوویڈ 19 کی غیرمعمولی صورتحال کے باوجود آسٹریلیا اور انگلینڈ کی ٹیمیں پاکستان آئیں گی۔ سیریز ایسے وقت میں رکھی گئی ہے کہ دونوں ٹیموں کے بڑے کھلاڑی پاکستان آسکیں۔ انہوں نے کہا کہ قومی کرکٹ ٹیم کی کارکردگی اور پی سی بی کی پالیسیوں سے اسٹیک ہولڈرز کا بورڈ پر اعتماد بڑا ہے،ایچ بی ایل پی ایس ایل کی براڈکاسٹنگ اور لائیو اسٹریمنگ کے حقوق کی بولی میں قابل ذکر اضافہ دیکھا گیا ہے۔ چیئرمین پاکستان کرکٹ بورڈ نے کہا کہ میری انتطامیہ کے تین بڑے ستون ہیں، کرکٹ، کمرشل اور ایڈمنسٹریشن جنہیں بہترین دیکھنا چاہتا ہوں۔