سابق بھارتی کپتان کپل دیو نے کہا ہے کہ ویرات کوہلی کو ٹیسٹ کپتانی چھوڑنے کے بعد ایک نئے لیڈر کے تحت کھیلنے کے لیے اپنی انا کو ختم کرنے کی ضرورت ہے۔
میڈیا رپورٹس کے مطابق بھارت کو 1983 کا ورلڈ کپ جتوانے والے کھلاڑی نے کہا کہ قومی ٹیم کے مستقبل کے بارے میں غیر یقینی صورتحال پھیل گئی ہے۔ انہوں نے کوہلی کے فیصلے کا خیرمقدم کرتے ہوئے کہا کہ وہ کڑے وقت سے گزر رہے ہیں اور بہت زیادہ دباؤ میں دکھائی دے رہے ہیں۔
یہ بھی پڑھیں: ویرات کوہلی ٹیسٹ ٹیم کی کپتانی سے دستبردار ہو گئے
یہ بھی پڑھیں: بھارتی بورڈ اور ویرات کوہلی کے مابین اختلافات کھل کر سامنے آگئے
کپل دیو نے کہا کہ سنیل گواسکر بھی میری کپتانی میں کھیل چکے ہیں اور میں بھی بغیر کسی انا کے سری کانت اور محمد اظہر الدین کے ماتحت کرکٹ کھیل چکا ہوں۔
63 سالہ سابق بھارتی کپتان کا کہنا تھا کہ ویرات کوہلی کو اپنی انا چھوڑ کر ایک نوجوان کرکٹر کی کپتانی میں کھیلنا پڑے گا اور اس سے اسے اور بھارتی کرکٹ کو مدد ملے گی۔ انہوں نے کہا کہ کوہلی کو نئے کپتان، نئے کھلاڑیوں کی رہنمائی کرنی چاہیے کیونکہ قومی ٹیم انہیں بطور بلے باز نہیں کھو سکتی۔
واضح رہے کہ ویرات کوہلی نے گزشتہ ہفتے جنوبی افریقہ سے ٹیسٹ سیریز ہارنے کے بعد ٹیسٹ کپتانی چھوڑنے کا اعلان کر دیا تھا جبکہ گزشتہ سال وہ ٹی ٹوئنٹی کی کپتانی چھوڑ چکے تھے اور اس کے فوراً بعد انہیں ون ڈے ٹیم کے سربراہ کے عہدے سے برطرف کر دیا گیا تھا۔