میزبان اور اداکارہ نادیہ خان نے پاکستان پیپلز پارٹی کی رکن سندھ اسمبلی شرمیلا فاروقی کی جانب سے ان کے خلاف قانونی کارروائی پر ردعمل دیا ہے۔
چند روز قبل سوشل میڈیا پر نادیہ خان کی شرمیلا فاروقی کی والدہ انیسہ فاروقی کے ہمراہ ایک ویڈیو وائرل ہوئی تھی جس میں نادیہ خان بظاہر تو انیسہ فاروقی سے ان کے میک اپ اور جیولری وغیرہ کے بارے میں پوچھ رہی تھیں لیکن ان کا انداز تمسخر اڑانے والا تھا۔
نادیہ خان کے اس رویے کو سوشل میڈیا صارفین نے بہت زیادہ محسوس کیا اور ان پر ایک عمر رسیدہ خاتون کا مذاق اڑانے پر شدید تنقید کی گئی۔ شرمیلا فاروقی نے بھی نادیہ خان کے اپنے والدہ کے ساتھ اس رویے پر سخت برہمی کا اظہار کرتے ہوئے ان کے خلاف سائبر کرائم میں شکایت درج کروائی۔ تاہم اب نادیہ خان نے اپنے یوٹیوب چینل پر ایک طویل ویڈیو شیئر کی ہے جس میں وہ انیسہ فاروقی کا تمسخر اڑانے کی وضاحت دیتی ہوئی نظر آرہی ہیں۔
نادیہ خان کی ویڈیو کا ایک مختصر کلپ سوشل میڈیا پر وائرل ہورہا ہے جس میں وہ کہہ رہی ہیں مجھے وہ خواتین بہت اچھی لگتی ہیں جو ہر عمر میں اپنا خیال رکھتی ہیں۔ نادیہ خان نے کہا کہ وہ ویڈیو میں انیسہ فاروقی کی تیاریوں کی تعریف کررہی تھیں جس پر وہ بہت خوش ہوئیں۔ انہوں نے کہا کہ وہ لال جوڑے میں آئی تھیں اکیلی تھیں اتنا اچھا میک اپ تھا میں نے ان کی تعریف کی اور وہ بہت خوش ہوئی آپ لوگ سہی طرح جا کے ویڈیو دیکھیں اگر میں نے کوئی لفظ طنزیہ استعمال کیا ہو کیونکہ ان ہی چیزوں پر اختلافات ہوتے ہیں۔
یہ بھی پڑھیں:شرمیلا فاروقی کا نادیہ خان کے خلاف قانونی کارروائی کرنے کا فیصلہ
مارننگ شو کی میزبان نے کہا کہ میں نے ویڈیو میں انیسہ فاروقی کے لیے ایک بھی برا لفظ نہیں کہا حالانکہ شرمیلا نے میرے لیے ’’بے شرم‘‘ کا لفظ استعمال کیا۔ یہ غلط لفظ ہے، یہ میری بے عزتی ہےاور یہ جرم ہے۔ نادیہ خان نے کہا اگر آپ کسی کو بدنام کرتے ہیں یا کسی کی نجی چیزوں کو وائرل کرتے ہیں تو یہ سائبر کرائم ہے لیکن اتنی پڑھی لکھی خاتون شرمیلا فاروقی کو سمجھ نہیں آرہا کہ میری اور انیسہ فاروقی کی ویڈیو میں سائبر کرائم کہاں ہے۔
نادیہ خان نے کہا کہ شکایت درج کرنے سے نہ مجھے اور نہ میرے گھروالوں کو کوئی فرق پڑرہا ہے۔ شرمیلا نے اگر سائبر کرائم میں شکایت درج کروائی تو اس کا ڈھنڈورا میڈیا پر کیوں پیٹا۔ اگر آپ کو اپنی والدہ کا اتنا احساس ہے تو آپ بغیر اعلان کیے جائیں۔ لیکن آپ کو ہر جگہ میڈیا چاہئے تاکہ آپ ہمدردیاں سمیٹ سکیں۔
