ائیرپورٹ سکیورٹی فورس (اے ایس ایف) کے عملے نے لاہور کے علامہ اقبال انٹرنیشنل ائیرپورٹ پر کروڑوں روپے کی ملکی اور غیر ملکی کرنسی دبئی اسمگل کرنے کی کوشش کو ناکام بناتے ہوئے دو مسافروں کو گرفتار کر لیا ہے۔
میڈیا رپورٹس کے مطابق اے ایس ایف کے ترجمان نے کہا ہے کہ علامہ اقبال انٹرنیشنل ائیرپورٹ پر 14 کروڑ 70 لاکھ روپے مالیت کی ملکی اور غیر ملکی کرنسی دبئی اسمگل کرنے کی کوشش ناکام بناتے ہوئے دو مسافروں کو گرفتار کر لیا گیا ہے۔
یہ بھی پڑھیں: پی ٹی آئی رہنما جویریہ ظفر نے شوہر کیخلاف گولی مارنے کا مقدمہ درج کر دیا
یہ بھی پڑھیں: ڈاکوؤں نے اسلام آباد میں چینی باشندوں کو لوٹ لیا
ترجمان کا کہنا تھا کہ دبئی جانے والے مسافر عمران ارشاد اپنے دو ساتھیوں کے ہمراہ ائیرپورٹ پر پہنچے جن میں سے ایک مسافر ویل چیئر پر تھا۔ انہوں نے کہا کہ اے ایس ایف کے عملے نے سامان کی اسکیننگ کے دوران ویل چیئر اور بیگز کو مشکوک قرار دیا جس سے چیکنگ کے بعد ملکی اور غیر ملکی کرنسی برآمد کر لی گئی۔
اے ایس ایف ترجمان نے مزید کہا کہ سامان سے مجموعی طور پر 84 ہزار امریکی ڈالر اور 4 لاکھ 65 ہزار پاکستانی کرنسی برآمد ہوئی۔ انہوں نے کہا کہ ملزمان کو ابتدائی تفتیش کے بعد مزید کارروائی کے لیے کسٹم حکام کے حوالے کر دیا گیا ہے۔
