لیموں سے بنی پھل بیٹری

3ہزار لیموں سے بنی دنیا کی سب سے بڑی پھل بیٹری کا ریکارڈ قائم

ہم بچپن سے ہی آلو اور لیموں سے چھوٹے بلب جلانے کے تجربات کرتے رہے ہیں۔ اب برطانیہ میں طلبا وطالبات نے 2923 لیموں کو جوڑ کر 2307 وولٹ بجلی بنائی ہے جو ایک عالمی ریکارڈ ہے۔ اس کی باقاعدہ تصدیق گنیز بک آف ورلڈ ریکارڈ کی ویب سائٹ پر کی گئی ہے۔میڈیا رپورٹس کے مطابق اس کا مظاہرہ 15 اکتوبر 2021 کو کیا گیا تھا۔ رائل سوسائٹی آف کیمسٹری (آرسی ایس)کے تحت یہ کارنامہ انجام دیا گیا ہے۔

آر سی ایس ایک بین الاقوامی تنظیم ہے جس سے دنیا بھر کے ہزاروں سائنسداں اور ماہر منسلک ہیں اور وہ باہم مل کر سائنسی سرگرمیوں میں حصہ لیتے ہیں۔ توانائی کے دیگر طریقوں اور کاربن سے پاک دنیا کے موضوع کے تحت مانچسٹر میں اس کا مظاہرہ کیا گیا تھا۔ اس پورے عمل میں بیٹریوں کے ماہر پروفیسر سیف الاسلام اور فرین اسکاٹ نے اس پورے عمل کی نگرانی کی۔ بڑے لیمو کو درمیان سے کاٹ کر انہیں جست اور تانبے کے تاروں سے جوڑا گیا تھا اور سلسلہ وار سرکٹ بنایا گیا تھا۔

مزید پڑھیں:  ججزکے خط کا معاملہ، وزیراعظم کی چیف جسٹس سے ملاقات

اس طرح دنیا کی طاقتور ترین پھل بیٹری وجود میں آئی .جس سے 2307 وولٹ بجلی بنائی گئی۔اس میں لیموں کا جوس الیکٹرولائٹ کے طور پر کام کرتا ہے جبکہ جست اور تانبے کے تار برقی رو آگے لے کر جاتے ہیں۔ اس کے لیے ہزاروں لیموں کو کئی شیلف میں رکھا گیا تھا اور جگہ جگہ اسے وولٹ میٹر سے جوڑ کر اس کی توانائی کی تصدیق کی گئی تھی۔ تین ہزار لیموں سے کل 2307 وولٹ بجلی بنائی گئی جبکہ اس سے قبل کا ریکارڈ 1521 وولٹ تھا۔ تجربے کے بعد بچے ہوئے لیموں کو ایک برطانوی کمپنی کو دیا گیا ہے جو پھلوں اور سبزیوں سے بجلی بناتی ہے جبکہ لیموں کے رس سے بایوفرٹیلائزر بنایا جائے گا۔

مزید پڑھیں:  پشاور، 4 لاکھ 38 ہزار 547 خاندان رمضان پیکج سے مستفید