وزیرخارجہ شاہ محمود قریشی کا کہنا ہے کہ بلاول بھٹو میں ناسمجھی اور تھوڑا بچپن ہے، بلاول کے استاد نالائق ہیں، لکھی ہوئی پرچیاں دی جاتی ہیں۔
وزیر خارجہ مخدوم شاہ محمود قریشی نے جنوبی پنجاب کے حوالے سے اہنےبیان میں کہا کہ بلاول بھٹو کی ناسمجھی ہے اور تھوڑا بچپن ہے، بلاول بھٹو کو ابھی تک ادراک نہیں کہ وہ کہہ کیا رہے ہیں اور حقیقت کیا ہے ، بلاول بھٹو کو لکھی ہوئی پرچیاں دے دیتے ہیں۔ بلاول بچہ ہے وہ لکھی ہوئی پرچیاں پڑھ دیتا ہے ،جیسے جیسے وقت گزرے گا بلاول سمجھ جائیں گے کہ محض تنقید سے جنوبی پنجاب صوبہ نہیں بنے گا، جنوبی پنجاب صوبہ آئینی ترمیم سے بنے گا۔
یہ بھی پڑھیں:وزیر اعظم نے اپنے چمچوں میں سرٹیفکیٹ بانٹ دیے: بلاول بھٹو
شاہ محمود قریشی نے کہا کہ میرا سوال ہے کہ کیا بلاول آئینی ترمیم کے لئے ہمارے ساتھ تعاون کرنے کے لئے تیارہیں ،اگرجنوبی پنجاب صوبے کو عملی جامہ پہنانا چاہتے ہیں تو آئیے مل کر آئینی ترمیم کیجئیے، میں بل پیش کررہا ہوں اگر آپ کی نیت صاف ہے تو اپنا ووٹ دیجئے اور جنوبی پنجاب کو حق دلائیے۔ میں نے انیس جنوری کو خط لکھا آپ نے جواب دینے کی زحمت گوارہ نہیں کی ، میں نے بلاول بھٹواور شہبازشریف کو آج دوبارہ خط لکھا ہے۔
انہوں نے کہا کہ یو این ڈی پی کی جو رپورٹ آئی ہے اس نے میرے موقف کی تصدیق کردی ہے کہ جنوبی پنجاب سب سے زیادہ پسماندہ ریجن ہے ، میں نے شہبازشریف کو بھی یو این ڈی پی کے تمام اعداد و شمار بھیجے ہیں، میری شہبازشریف سے درخواست ہے کہ جنوبی پنجاب کے معاملے پر سنجیدگی سے غور کریں ۔ جنوبی پنجاب کے حقائق کو سامنے رکھ کر آگے بڑھنا ہوگا، اگر بلاول بھٹو اور شہبازشریف اپنے سیاسی مفاد کو بھی ملحوظ خاطر رکھیں تو انھیں جنوبی پنجاب کی تشکیل اور تخلیق میں رکاوٹ نہیں بننا چاہیے۔
