پاکستان تحریک انصاف (پی ٹی آئی) کے کارکنوں نے وفاقی دارالحکومت اسلام آباد میں ایک بار پھر سندھ ہاؤس پر حملہ کر دیا اور دروازے پر لاتیں مار کر توڑ ڈالا۔
تفصیلات کے مطابق دروازہ توڑنے کے بعد پی ٹی آئی کے کارکنان سندھ ہاؤس کے احاطے میں داخل ہوگئے۔ اس موقع پر پی ٹی آئی کے رکن قومی اسمبلی عطا اللہ نیازی بھی کارکنان کے ساتھ موجود تھے۔
یہ بھی پڑھیں: سندھ میں گورنر راج ، پاکستان بار کونسل کی شیخ رشید کے بیان کی مذمت
سندھ ہاؤس کے اندر زبردستی گھسنے کے بعد پی ٹی آئی کے کارکنان نے احتجاج کیا اور نعرے بازی کی۔ سندھ ہاؤس میں تعینات سندھ پولیس کارکنان کے سامنے بے بس ہے جبکہ اسلام آباد پولیس کی نفری بھی پہنچ گئی تاہم وہ نفری بھی تحریک انصاف کے کارکنان کو روکنے میں ناکام ہے۔
اس سے قبل پاکستان تحریک انصاف کے کارکنان ریڈ زون میں موجود سندھ ہاؤس کے باہر پہنچے جہاں انہوں نے احتجاج کیا اور دھرنا دیا۔ بعدازاں پی ٹی آئی کارکنان نے دھرنا ختم کردیا اور منتشر ہوگئے۔
