ویمنز ٹی ٹوئنٹی انڈر 19 ورلڈ کپ کے کوالیفائر میچ میں متحدہ عرب امارات کی ٹیم نے ایک انتہائی یکطرفہ مقابلے کے بعد نیپال کی ٹیم کو دس وکٹوں سے شکست دیدی، نیپال کی ٹیم نے ٹاس جیت کر پہلے بیٹنگ کرنے کا فیصلہ کیا مگر ان کا یہ فیصلہ اس وقت انتہائی غلط ثابت ہوا جب ان کی پوری ٹیم 8.1 اوورز میں صرف 8رنز پر ڈھیر ہو گئی ، چھ بیٹرز کھاتہ کھولے بغیر پویلین لوٹ گئیں جبکہ نیپال کی جانب سے بہترین سکور تین رنز رہا جو سنیہا ماہارا نے سکور کیا،
متحدہ عرب امارات کی جانب سے مائیکا گوہر نے پانچ رنز دیکر دو جبکہ اندوجا ننداکمار نے تین رنز دیکر چھ کھلاڑیوں کو پویلین کی راہ دکھائی، جواب میں یو اے ای کی اوپنرز نے مطلوبہ ہدف 1.1 اوور میں بغیر کسی نقصان کے حاصل کرلیا، یاد رہے کہ جمعہ کے روز اپنے پہلے میچ میں نیپال کی ٹیم نے قطر کو 79 رنز سے شکست دی تھی نیپال نے قطر کیخلاف پہلے کھیلتے ہوئے تین وکٹوں کے نقصان پر 117 رنز بنائے جبکہ جواب میں قطر کی ٹیم صرف38 رنز پر ڈھیر ہو گئی تھی۔