ویب ڈیسک :مون سون بارشوں کا نیا سلسلہ پاکستان کے مختلف حصوں بالخصوص بلوچستان میں جاری ہے، جس کے دوران مزید 6 افراد جان کی بازی ہار گئے،
اس میں سے 4 اموات لسبیلہ اور 2 پنجاب کے ضلع ڈیرہ غازی خان میں ہوئیں جہاں افراد سیلاب میں اپنا آشیانہ کھونے کے بعد پھنسے ہوئے ہیں۔
لسبیلہ کے ڈی پی او دوستین دشتی نے ڈان کو بتایا کہ بہہ جانے والے چار نامعلوم افراد کی لاشیں دریائے حب سے نکالی گئیں جس کے میدانی علاقوں میں موسلادھار بارشوں کی وجہ سے اونچے درجے کا سیلاب ہے۔
انہوں نے مزید کہا کہ لاشیں ایدھی فانڈیشن کے حوالے کر دی گئیں، بلوچستان میں مزید 4 لاشیں ملنے کے بعد جاں بحق افراد کی تعداد 194 ہوگئی۔دریں اثنا ڈیرہ غازی خان کے علاقے تونسہ میں کوہ سلیمان کے پہاڑوں سے آنے والے سیلاب کی زد میں آکر 13 اور 11 سال کے دو بھائی ڈوب کر جاں بحق ہوگئے۔
سیلاب کے نتیجے میں ڈی جی خان اور راجن پور کے دیہی علاقوں میں رہنے والے لوگوں نے حفاظت کے لیے اونچی جگہوں پر منتقل ہونا شروع کر دیا۔