وزیر داخلہ رانا ثناء اللہ کا کہنا ہے کہ ایجنسیوں کی رپورٹ ہے کہ چیئرمین پاکستان تحریک اور سابق وزیر اعظم عمران خان کی جان کو خطرہ ہے لہٰذا پی ٹی آئی اپنا راولپنڈی کا جلسہ ملتوی کر دے
ویب ڈیسک: اسلام آباد میں پریس کانفرنس کرتے ہوئے وفاقی ویر داخلہ رانا ثنا اللہ کا کہنا تھا کہ عمران خان کی جان کو خطرہ ہے انٹیلی جنس ایجنسیوں کی رپورٹ ہے کہ پی ٹی آئی کے جلسے میں دہشت گردی ہو سکتی ہے، عمران خان کو مشورہ ہے کہ کل کا جلسہ ملتوی کر دیں، جلسہ گاہ کی سکیورٹی کے لیے ایڈوائزی بھی جاری کی ہے، عمران خان قبل ازوقت انتخابات چاہتے ہیں تو سیاستدانوں سے ڈائیلاگ کریں، سٹیبلشمنٹ آپ کو الیکشن کی تاریخ نہیں لے کر دے گی۔
رانا ثنا اللہ کا کہنا تھا کہ پاکستان کی مشکلات کا حل، کامیابی اور ترقی کا راز آئین و قانون کی حکمرانی میں ہے، پاک فوج کی طرف سے اپنے آئینی کردار میں رہنے کا اعلان ملک و قوم کے بہترین مفاد میں ہے، مسلح افواج کو مختلف انداز سے تنقید کا نشانہ بنایا گیا لیکن عمران خان صاحب کو پنڈی سے الیکشن کی تاریخ نہیں ملے گی۔
انہوں نے کہا کہ آپ نے پچھلے چند ماہ جو کچھ کہا کوئی آپ کی بلیک میلنگ میں نہیں آیا، ڈیڈ لاک بات چیت سے ختم ہوتے ہیں، عمران خان سیاستدان بنیں اور پی ڈی ایم کی قیادت کے ساتھ بیٹھیں، عمران خان سیاسی مخالف ہیں دشمن نہیں، لیکن عمران خان کہتے ہیں کہ مخالفین کے ساتھ بیٹھنے کی بجائے مرنے کو ترجیح دونگا۔
وزیر داخلہ نے کہا کہ عمران خان کا یہ رویہ درست نہیں ہے، سیاستدان جب گفتگوکرتے ہیں تو ڈیڈلاک ٹوٹتے ہیں۔
