میئر کراچی کے معاملے پر بات چیت، جماعت اسلامی اور پی ٹی آئی نے مینڈیٹ کو تسلیم کرنے کا مطالبہ کرتے ہوئے چار رکنی مشترکہ کمیٹی تشکیل دے دی۔
ویب ڈیسک: تفصیلات کے مطابق میئر کراچی کے معاملے پر بات چیت کیلئے جماعت اسلامی کا وفد حافظ نعیم الرحمان کی قیادت میں پی ٹی آئی سیکرٹریٹ آفس پہنچا، تحریک انصاف کراچی کے صدر بلال غفار نے جماعت اسلامی کے وفد کا استقبال کیا جس کے بعد پی ٹی آئی اور جماعت اسلامی کے رہنماؤں کی ملاقات ہوئی۔
پی ٹی آئی وفد کی قیادت صوبائی صدر علی زیدی نے کی جبکہ دیگر رہنماؤں میں جنرل سیکرٹری سندھ مبین جتوئی اور بلال غفار بھی شامل تھے۔
ملاقات کے بعد میڈیا سے گفتگو کرتے ہوئے پی ٹی آئی رہنما علی زیدی کا کہنا تھا فارم 11 کے معاملے پر 4 رکنی مشترکہ کمیٹی بنانے پر اتفاق ہوا ہے، مشترکہ کمیٹی فارم 11 اور الیکشن سے متعلق دیگر معاملات کو دیکھے گی۔
حافظ نعیم الرحمان کا کہنا تھا بلدیاتی الیکشن کمپرومائزڈ تھا، الیکشن کے حوالے سے ہمیں شدید تحفظات تھے، جماعت اسلامی کی پوزیشن ہے کہ ہم کراچی میں اپنا میئر لائیں، اگر پیپلز پارٹی جائز طریقے سے جیتتی ہے تو ہمیں کیا اعتراض ہو سکتا ہے۔
ان کا کہنا تھا بلدیاتی الیکشن ہوا اور عوام نے اپنی رائے کا اظہار کیا، ہم چاہتے ہیں کہ جس کو عوام نے مینڈیٹ دیا ہے اسے تمام سیاسی جماعتیں تسلیم کریں، ہم چاہتے ہیں کہ شہر میں اتفاق رائے پیدا کیا جائے۔
امیر جماعت اسلامی کراچی کا کہنا تھا اختلاف رائے کے باوجود جماعت اسلامی کی خواہش ہے کہ ہم شہر کی بہتری کے لیے کام کریں، پی ٹی آئی سے درخواست ہے کہ ہماری مدد کرے۔
