وزیراعظم شہبازشریف قطر کی ترقی پذیر ممالک سے متعلق اقوام متحدہ کی کانفرنس میں شرکت کیلئے دو روزہ دورہ قطر کے موقع پر امیرقطر شیخ تمیم بن حمدالثانی سے ملاقات میں دو طرفہ تعاون بڑھانے پر بات چیت ہوئی۔
ویب ڈیسک:وزیراعظم شہبازشریف امیر قطر کی دعوت پر اقوام متحدہ کے زیراہتمام کم ترقی یافتہ ممالک سے متعلق کانفرنس کے پانچویں اجلاس میں شرکت کے لئے قطر پہنچے ہیں۔
وزیراعظم شہبازشریف اور شیخ تمیم بن حمد آل ثانی نے دوطرفہ باہمی مفاد کے وسیع تر امور پر تبادلہ خیال کیا، پاکستان اور قطر کے درمیان معاشی و سرمایہ کاری سمیت دیگر شعبوں میں پہلے سے استوار بہترین تعاون کو مزید بڑھانے کے طریقوں پر بات چیت کی۔
امیر قطر نے قطر کی ترقی میں پاکستانی محنت کشوں کی کاوشوں کو سراہا اور خاص طور پر قطر کی میزبانی میں فیفا ورلڈ کپ 2022 کے کامیاب انعقاد کے موقع پر پاکستانی سیکیورٹی حکام کی شاندار کارکردگی کو سراہا۔
ملاقات میں وزیراعظم شہبازشریف نے پاکستان کی ترقی کے منصوبوں میں قطر کی مسلسل حمایت کو سراہتے ہوئے دونوں ممالک کے درمیان تعاون بڑھانے کے وسیع مواقع کو اجاگر کیا۔ قطر کے ساتھ دوطرفہ تعاون کو مضبوط بنانے، سرمایہ کاری، تجارت اور پاکستان سے ہنرمند افراد کی قطر برآمد کو بڑھانے پر بات چیت ہوئی۔
وزیراعظم نے امیر قطر کو دورہ پاکستان کی دعوت دی جسے انہوں نے قبول کرلیا۔ ترقی کرتے ممالک کی کانفرنس کا یہ پانچواں اجلاس ہے جو 5 مارچ سے قطر کے دارالحکومت دوحا میں شروع ہوگا۔
امیر قطر کانفرنس میں شرکت کرنے والے سربراہان مملکت اور وزراء اعظم کے اعزاز میں استقبالیہ دیں گے، جس میں وزیراعظم شہباز شریف بھی امیر قطر کے استقبالیہ میں شرکت کریں گے۔
وزیراعظم شہباز شریف 6 مارچ کو کانفرنس کے اجلاس سے خطاب کریں گے۔
