زلمی کو شکست

زلمی کو شکست، سلطانز نے پی ایس ایل تاریخ کا سب سے بڑا ہدف حاصل کرلیا

پاکستان سپر لیگ (پی ایس ایل) سیزن 8 کے 27 ویں میچ میں ملتان سلطانز کی ٹیم نے 6 وکٹوں کے نقصان پرایونٹ کی تاریخ کا سب سے بڑا ہدف حاصل کرتے ہوئے پشاور زلمی کو شکست دے کر پلے آف مرحلے تک رسائی حاصل کرلی۔
راولپنڈی کرکٹ اسٹیڈیم میں کھیلے گئے پاکستان سپر لیگ 8 کے 27 ویں میچ میں ملتان سلطانز نے 243 رنز کا ہدف 6 وکٹوں کے نقصان پر 19.1 اوورز میں حاصل کر کے پشاور زلمی کو شکست دےدی۔
ملتان سلطانز کی جانب سے رائلی روسو نے 51 گیندوں پر 121 رنز کی طوفانی اننگ کھیل کر ٹیم کی فتح میں اہم کردار ادا کیا۔ کیرون پولارڈ نےبھی 25 گیندوں پر52 رنز بنا کر فتح میں بڑا حصہ ڈالا۔
خوشدل شاہ 18، کپتان محمد رضوان 7، شان مسعود 5 اور ٹِم ڈیوڈ 2 رنز بنا کرآؤٹ ہوئے۔ انور علی 28 اور اسامہ میر 10 رنز بنا کر ناٹ آؤٹ رہے۔
پشاورزلمی کی جانب سے عظمت اللہ عمر زئی نے 2 جبکہ وہاب ریاض،مجیب الرحمان، ارشد اقبال اور صائم ایوب نے 1،1 وکٹ حاصل کی۔
اس سے قبل پشاور زلمی نے ٹاس جیت کر پہلے بیٹنگ کرتے ہوئے مقررہ 20 اوورز میں 6 وکٹوں کے نقصان پر 242 رنز بنائے۔
پشاور زلمی کی جانب سے کپتان بابر اعظم 73 رنز بنا کر نمایاں رہے۔ صائم ایوب 58، ٹام کوہلر کیڈمور 38، محمد حارث 35، حسیب اللہ خان 7 اور روومن پاول 2 رنز بنا کر آؤٹ ہوئے۔عظمت اللہ عمرزئی 16 اور وہاب ریاض 7 رنز بنا کر ناٹ آؤٹ پویلین لوٹے۔
ملتان سلطانز کی جانب سے عباس آفریدی نے 4 جبکہ انور علی اور اسامہ میر نے 1،1 وکٹ حاصل کی۔

مزید پڑھیں:  ٹانک میں امن جرگہ کی کال پر بازار بند، شاہراہ بند