ویب ڈیسک: پی ڈی ایم جماعتوں کی اتحادی حکومت اورپاکستان تحریک انصاف کے درمیان آج مذاکرات کافائنل رائونڈہوگاتاہم حکومت کی بعض شخصیات اورپی ٹی آئی کے بعض رہنما مذاکرات کی کامیابی کے امکانات کم بتارہے ہیں۔لاہور میں ریلی سے خطاب میں پاکستان تحریک انصاف کے چیئرمین عمران خان نے کہا کہ مذاکرات میں ہم نے ایک ہی بات کہنی ہے کہ 14 مئی سے پہلے اسمبلیاں ختم کریں ہم ایک ساتھ الیکشن کیلئے تیار ہیں۔پی ٹی آئی کی ریلی کا آغاز لبرٹی گول چکر سے ہوا اور ریلی میں کارکنوں کی بڑی تعداد شریک رہی۔عمران خان نے ناصر باغ میں گاڑی کے اندر سے ریلی سے خطاب کیا اور کہاکہ ہم پر جرائم پیشہ مسلط کیے گئے
یہ الیکشن سے بھاگ رہے ہیں، یہ تب الیکشن کراناچاہتے ہیں جب سمجھیں گے کہ میں راستے سے ہٹ گیا، ان کا صرف ایک مقصد ہے کہ کسی طرح مجھے ہٹائیں۔انہوں نے کہا کہ سپریم کورٹ نے واضح طورپرکہا ہے 14 مئی کوپنجاب کا الیکشن ہوگا، سپریم کورٹ نے کہا کہ ان سے مذاکرات کریں، اگریہ متفق ہوجاتے ہیں توصرف پنجاب کا نہیں پورے ملک میں الیکشن ہوگا۔ اگر یہ سمجھتے ہیں کہ ہم ان کے منصوبے میں پھنس کر انتظار کریں گے کہ ستمبر میں الیکشن ہوگا توکسی غلط فہمی میں نہ رہیں، 14 مئی سے پہلے اسمبلیاں ختم نہ کیں تو عدالت کو کہیں گے کہ ہمیں پنجاب اور خیبرپختونخوا کا الیکشن چاہیے۔ان کا کہنا تھاکہ ان لوگوں نے آئین توڑا یا ججز کے خلاف کچھ کیا تو پی ٹی آئی سڑکوں پر ہو گی، تحریک انصاف سپریم کورٹ اور چیف جسٹس کے ساتھ کھڑی ہو گی۔
