ویب ڈیسک: سرمایہ کاری اور ورک ویزا پالیسی میں ترمیم منظور کر لی گئی۔ تفصیلات کے مطابق وفاقی کابینہ اجلاس میں فیصلہ کیا گیا کہ سرمایہ کاری کرنیوالوں کو 6 ماہ کا بزنس ویزا 24 گھنٹے میں جاری ہوگا، اس حوالے سے وفاقی کابینہ نے بزنس، سرمایہ کاری اور ورک ویزا پالیسی میں ترمیم کی منظوری دے دی ہے۔
ذرائع کے مطابق ویزا پالیسی میں ترمیم کی منظوری غیرملکی سرمایہ کاری اور تجارت کے فروغ کیلئے دی گئی، وفاقی کابینہ سے 103 ممالک کیلئے ویزا پالیسی میں ترمیم کی منظوری بذریعہ سرکولیشن لی گئی۔ اس اقدام سے سرمایہ کاروں کی چاندی ہو گئی ہے۔
ذرائع نے بتایاکہ سپیشل انویسٹمنٹ فسیلی ٹیشن کونسل (ایس آئی ایف سی) کی سفارش پر ویزا پالیسی میں ترامیم تیار کی گئیں۔
ذرائع کا کہنا ہے کہ ایس آئی ایف سی کی سفارش پر 6 ماہ کےلیے بزنس ویزا فوری طور پر جاری کیا جائے گا، پاکستانی مشن 5 سال کےلیے بزنس ویزا 24 گھنٹوں میں جاری کرنے کے پابند ہوں گے۔
ذرائع کے مطابق ایک سال کےلیے شارٹ ٹرم انویسٹر ویزا بھی 24 گھنٹوں میں جاری کیا جائے گا، اسی طرح ایس آئی ایف سی کی سفارش پر تین سال کا انویسٹر ویزا 24گھنٹوں میں جاری ہوگا جبکہ 5سال کےلیے انویسٹر ویزا وزارت داخلہ 10دن میں جاری کرنے کی پابند ہوگی، 2سال کےلیے ورک ویزا وزارت داخلہ سیکیورٹی کلیئرنس ملنے کے بعد ایک ماہ میں جاری کرے گی۔
