ویب ڈیسک: ملکی معیشت کی بہتری، کالا دھن روکنے اور روپے کی قدر بہتر بنانے سمیت مختلف قسم کی ادائیگیوں کے لیے حکومت کی جانب سے ڈیجیٹل کرنسی متعارف کرانے کا فیصلہ کیا گیا ہے۔ ذرائع کے مطابق ڈیجیٹل کرنسی کی قدر پاکستانی روپے کے برابر ہی ہوگی جیسے چین کی ڈیجیٹل کرنسی کا ایک یونٹ چینی یوآن کے برابر ہے اور اس کو سٹیٹ بینک کی مکمل حمایت حاصل ہوگی۔
یہ پیپر کرنسی کی طرح لیکل ٹینڈر یعنی حکومتی ضمانت کی بنیاد پر جاری ہوں گے۔ ذرائع نے بتایا کہ اس کیلئے سینٹرل بینک ڈیجیٹل کرنسی (سی بی ڈی سی) کے نام سے ایک ادارہ کام کررہا ہے جو اس کی لاگت اور دیگر عوامل کا جائزہ لے رہا ہے تاکہ ہر قسم کی باریکی کو مد نظر رکھا جائے اور ڈیجیٹل کرنسی شروع کرنے کے بعد کسی قسم کی کمی یا خرابی اس میں باقی نہ رہ جائے۔
ذرائع کے مطابق ڈیجیٹل کرنسی منصوبہ کے مطابق دھیرے دھیرے جاری کی جائے گی اور کاغذی نوٹوں کو کم کیا جائے گا، آخر میں 90 فیصد ڈیجیٹل کرنسی کا استعمال ہوگا اور کاغذی نوٹوں کا صرف 10 فیصد تک حصہ رہ جائے گا۔ وہ بھی صرف اس لیے کہ اگر کوئی بڑا مسئلہ ہوجائے تو متبادل کرنسی موجود ہو۔ ڈیجیٹل کرنسی نظام میں کرنسی سے کی جانے والی ہر ٹرانزیکشن کا ریکارڈ ہوگا۔
