ویب ڈیسک: نگران وزیراعظم انوار الحق کاکڑ نے نیو یارک میں اقوام متحدہ کی جنرل اسمبلی کے 78 ویں اجلاس کے موقع پر ایرانی صدر ابراہیم رئیسی سے ملاقات کی اور اس موقع پر دو طرفہ تعاون کو مزید مستحکم کرنے کے عزم کا اعادہ کیا۔ ملاقات میں دونوں ہمسایہ ممالک کے درمیان قریبی برادرانہ تعلقات کو اجاگر کرتے ہوئے نگران وزیراعظم نے تعلقات مزید مستحکم اور گہرا کرنے کے عزم کا اعادہ کیا۔
اقدا متحدہ کی جنرل اسمبلی اجلاس میں ہونیوالی ملاقات کے دوران انوار الحق کاکڑ اور ابراہیم رئیسی نے دونوں ممالک کے مابین اقتصادی شعبے میں تعاون بڑھانے پر بھی خصوصی توجہ دینے کا عزم ظاہر کیا۔
نگران وزیراعظم نے اس بات پر زور دیا کہ بارڈر مارکیٹ کے حالیہ افتتاح سمیت دیگر اقدامات سرحدی علاقوں کی اقتصادی ترقی میں معاون ثابت ہوں گے، ساتھ ہی دونوں ممالک کے عوام کی بہتری کے لئے کام کرنے کے اجتماعی عزم کے ٹھوس اظہار کے طور پر بھی کام کریں گے۔
اس موقع پر انوار الحق کاکڑ نے زور دیتے ہوئے کہا کہ ہمیں اپنے جغرافیائی محل وقوع سے فائدہ اٹھاتے ہوئے علاقائی امن و خوشحالی کے مشترکہ مقاصد کو فروغ دینا چاہئے۔
نگران وزیراعظم انوار الحق کاکڑ نے اقوام متحدہ کی جنرل اسمبلی کے 78 ویں اجلاس کی افتتاحی تقریب اور پائیدار ترقیاتی اہداف پر اعلیٰ سطحی سربراہی اجلاس میں شرکت کی. اپنے خطاب میں انہوں نے کہا کہ ترقی پذیر ملکوں کو ترقیاتی اہداف کے حصول میں وسائل کی کمی کا سامنا ہے، پائیدار ترقی کے لئے یکساں مواقع ضروری ہیں۔
