ویب ڈیسک: آئی ایم ایف نے ایف بی آر اور وزارت خزانہ سے ریونیو بڑھانے کیلئے اقدامات کی ہدایت کرنے سمیت پٹرولیم مصنوعات کی سمگلنگ بارے رپورٹ طلب کر لی۔ پاکستان میں پٹرولیم مصنوعات کی سمگلنگ ماہانہ 1 لاکھ 20 ہزار ٹن تک پہنچ گئی جس پر آئی ایم ایف نے تشویش کا اظہار کیا ہے۔
ایف بی آر ذرائع کے مطابق درآمدی بل میں کمی اور ریونیو شارٹ فال بڑھنے کے خدشہ کے پیش نظر عالمی مالیاتی ادارے نے وزارت خزانہ اور ایف بی آر سے پٹرولیم مصنوعات کی سمگلنگ کی روک تھام کے اقدامات پر رپورٹ طلب کر لی ہے۔ آئی ایم ایف نے بارڈر پر کسٹم، ایجنسی اہلکار، فورسز کی تعداد اور استعداد کار بڑھانے کا مطالبہ کرتے ہوئے کہا ہے کہ پٹرولیم مصنوعات کی سمگلنگ سے کسٹم اور لیوی کی مد میں 10 ارب سے زائد نقصان ہو رہا ہے، ماہانہ 143 ملین لٹر پٹرولیم مصنوعات کی سمگلنگ کو روکا جائے۔ خزانہ ڈویژن کے ذرائع کے مطابق آئی ایم ایف نے ایف بی آر اور وزارت خزانہ کو ریونیو بڑھانے کیلئے اقدامات کی بھی ہدایت کی ہے۔
