ویب ڈیسک: ملک میں عام انتخابات جنوری میں کرانے کا اعلان کر دیا گیا۔ تفصیلات کے مطابق الیکشن کمیشن آف پاکستان کی جانب سے عام انتخابات جنوری 2024 کے آخری ہفتے میں کروانے کا اعلان کر دیا گیا .
الیکشن کمیشن کی جانب سے جاری اعلامیے میں کہا گیا ہے کہ 27 ستمبر کو حلقہ بندیوں کی ابتدائی فہرست شائع کر دی جائے گی جبکہ حلقہ بندیوں پر اعتراضات اور تجاویز کی سماعت کے بعد 30 نومبر کو حتمی فہرست جاری کی جائے گی۔
الیکشن کمیشن کا کہنا ہے کہ حتمی فہرست کے 54 دن بعد جنوری کے آخری ہفتے میں عام انتخابات کروائے جائیں گے۔ واضح رہے کہ اس سے قبل الیکشن کمیشن آف پاکستان نے سیاسی جماعتوں کی آرا کی روشنی میں حلقہ بندی کے کام کو جلد از جلد مکمل کرنے کے لیے اس دورانیے کو کم کرتے ہوئے اعلان کیا تھا کہ حلقہ بندیوں کی حتمی اشاعت 30 نومبر 2023 تک کردی جائے گی۔
الیکشن کمیشن کی طرف سے جاری بیان میں کہا گیا ہے کہ آئندہ عام انتخابات کے لیے الیکشن کمیشن نے سیکشن 233، الیکشن ایکٹ 2017 کے تحت ضابطہ اخلاق پر مشاورت کے لیے سیاسی جماعتوں کا اجلاس 4 اکتوبر 2023 کو دوپہر 2 بجے الیکشن کمیشن سیکریٹریٹ میں طلب کیا ہے۔
