ویب ڈیسک: میلوڈی کوئین اور سروں کی ملکہ جیسے اعزازات پانے والی ملکہ ترنم نور جہاں کی 97 ویں سالگرہ آج منائی جا رہی ہے۔ پانچ دہائیوں تک فلموں کو اپنی آواز سے جلا بخشنے والی میلوڈی کوئین 21 ستمبر 1926ء کو قصور میں پیدا ہوئیں۔
ملکہ ترنم نور جہاں آج بھی لوگوں کے دلوں میں ویسے ہی زندہ ہیں جیسے پہلے ہوا کرتی تھیں، مداح ان کی آواز کے سحر میں اب بھی گرفتار ہیں۔
ملکہ ترنم نور جہاں کا اصل نام اللہ وسائی تھا، انہوں نے اپنے فنی کیرئیر کا آغاز 1935ء میں بطور چائلڈ سٹار فلم ’’پنڈ دی کڑیاں‘‘ سے کیا جس کے بعد انمول گھڑی، ہیرسیال اور سسی پنوں جیسی مشہور فلموں میں اداکاری کے جوہر دکھائے۔ 1941 میں موسیقار غلام حیدر نے انہیں اپنی فلم خزانچی میں پلے بیک سنگر کے طور پر متعارف کروایا۔
اسی سال ممبئی میں بننے والی فلم ’’خاندان‘‘ ان کی زندگی کا ایک اور اہم سنگ میل ثابت ہوئی، اس فلم کی تیاری کے دوران ہدایت کار شوکت حسین رضوی سے ان کی محبت پروان چڑھی اور دونوں رشتہ ازدواج میں منسلک ہو گئے۔
قیام پاکستان کے بعد نور جہاں نے فلم ’’چن وے‘‘ سے اپنے لالی ووڈ کیریئر کا آغاز کیا، انہوں نے اداکاری سے کنارہ کشی کی تو پھر خود کو گلوکاری تک محدود کر لیا، ایک ریکارڈ کے مطابق ملکہ ترنم نور جہاں نے 995 فلموں کیلئے نغمے ریکارڈ کروائے جبکہ انہوں نے مجموعی طور پر 10 ہزار سے زیادہ غزلیں گائیں، گلیمر کی دنیا سے لے کر جنگ کے محاذ تک ملکہ ترنم نور جہاں نے سب کو اپنی آواز کے سحر میں جکڑے رکھا۔
حکومت پاکستان نے ملکہ ترنم نور جہاں کو انہی خدمات کے عوض انہیں صدارتی تمغہ برائے حسن کارکردگی اور نشان امتیاز سے بھی نوازا۔
