کالعدم تنظیم ٹی ٹی پی کیلئے بھتہ لینے والے گروہ کے گرفتار 2 اراکین کے دوران تفتیش ہوشربا انکشافات
ویب ڈیسک: سیکورٹی اداروں کی بڑی کامیابی، ٹی ٹی پی کے لۓ بھتہ لینے والے سرگرم گروپ کے اراکین دھر لیے گئے، دوران تفتیش گرفتار ملزموں کے ہوشروبا انکشافات۔ تفصیلات کے مطابق ٹی ٹی پی کے لۓ بھتہ لینے والے سرگرم ارکان کو خفیہ اطلاعات کی بنیاد پر گرفتار کر لیا گیا۔ گرفتار ارکان نے بھتہ لینے کے طریقہ کار کے حوالے سے بڑے انکشافات کر دیے۔
گرفتار ارکان کئی عرصے سے مختلف طریقوں سے ٹی ٹی پی کو بھتہ خوری میں معاونت فراہم کررہے تھے۔ ذرائع کے مطابق گرفتار ملزمان نے ٹی ٹی پی کے کمانڈرز کی افغانستان میں موجودگی کو بھی کنفرم کیا۔ ٹی ٹی پی کمانڈر، عبدالرازق جو اس وقت افغانستان میں ہے ہمیں وٹس ایپ کے ذریعے ہدایات دیتا تھا۔
گرفتار ملزمان نے بتایا کہ ٹی ٹی پی کمانڈر عبدالرازق لوگوں کے گھروں اور دکانوں کی ویڈیوز منگوا کر ان کو بھتے کے لئے کالز افغانستان سے کرتا تھا۔ ملزمان نے انکشاف کیا کہ بھتہ نہ ملنے یا تاخیر کی صورت میں جان سے مارنے یا اغواء کرنے کی دھمکیاں بھی دیتا تھا۔
ذرائع کے مطابق قانون نافذ کرنے والے ادارے عوام کے تحفظ کیلۓ بھرپور اقدامات اٹھا رہے ہیں، آئے دن سیکیورٹی فورسز کو ٹی ٹی پی کے سرغنہ گروہ کا قلع قمع کرنے اور بھتہ مافیا کے خلاف کریک ڈاؤن کرنے میں خاطر خواہ کامیابیاں مل رہی ہیں۔
