چیئرمین پی ٹی آئی کو آئینی طریقے سے ہٹا یا گیا، انتخابی عمل جلد ہی شروع ہونے جا رہا ہے۔
ویب ڈیسک: نگران وزیراعظم انوارالحق کاکڑ نے ترکیہ کے نشریاتی ادارے کو انٹرویو دیتے ہوئے کہا ہے کہ میں یقین دلاتا ہوں کہ انتخابی عمل صاف و شفاف اور آزادانہ ہوگا اور اس عمل میں انتظامی سطح پر کسی خاص گروپ کی مخالفت یا حمایت نہیں کی جائے گی۔ انتخابی عمل جلد ہی شروع ہونے جا رہا ہے۔ انوارالحق کاکڑ کا کہنا تھا کہ جمہوریت میں پرامن احتجاج ہر سیاسی جماعت کا حق ہے ان سے یہ حق کسی طور چھینا نہیں جا سکتا، انہوں نے کہا کہ ہر سیاسی جماعت کے پرامن احتجاج کا تحفظ کریں گے تاہم تشدد آمیز مظاہروں کی اجازت قطعی نہیں دی جا سکتی۔
انہوں نے مزید کہا کہ انتخابی حلقہ بندیاں آئینی ضرورت ہیں ان پر اعتراض سابق پارلیمنٹ میں قانون سازی کے وقت کیا جاسکتا تھا، ہم نے قانون اور آئین کے مطابق عمل کرنا ہے اور الیکشن کمیشن بھی غیر آئینی کام نہیں کرسکتا۔
انوار الحق کاکڑ کا کہنا تھا کہ چیئرمین پی ٹی آئی کو آئینی طریقے سے اقتدار سے الگ کیا گیا، آئین میں حکومت کی تشکیل اور ہٹانے کا طریقہ موجود ہے، سابق وزیراعظم امریکی سازش کے بیانیے سے خود پیچھے ہٹ گئے، بعض اوقات سیاستدان عوامی حمایت کیلئے ایسا بیانیہ بناتے ہیں۔
