ویب ڈیسک: محکمہ انسداد دہشتگردی مردان 2 کی بھتہ خوری میں ملوث تحریک طالبان ٹی ٹی پی سے منسلک گروہ کے خلاف اہم کاروائی، گروہ کے 2 اہم اراکین فیض اللہ ولد حیات اللہ سکنہ چارگلی امبار مہمند اور سعید اللہ ولد زرعالم خان سکنہ افغانستان حال گرین ٹاؤن لاہور گرفتار کر لئے گئے۔ ملزمان سے بھتہ خوری میں استعمال ہونے والے موبائل فونز اور پاکستان کے مختلف شہروں کے کاروباری حضرات کے وزٹنگ کارڈز کثیر تعداد میں برآمد کر لئے گئے۔
ذرائع کے مطابق عرصہ دراز سے عوام کو کالعدم تنظیم تحریک طالبان پاکستان ٹی ٹی پی کی طرف سے بذریعہ واٹس ایپ و موبائل کالز افغانستان کے نمبرات سے بھتہ کی رقم کا مطالبہ کیا جاتا تھا۔ اس دوران لوگ جان و مال کے خوف کا شکار ہو جایا کرتے تھےتاہم اس حوالے سے عوام کی جانب سے 28 تحریری شکایات درج کی گئی تھیں۔
کالعدم تنظیم ٹی ٹی پی کی طرف سے بذریعہ فائرنگ، ہینڈ گرینیڈ وغیرہ کے واقعات میں 2 افراد جاں بحق، ایک زخمی ہو چکا ہے جبکہ مالی نقصان میں سولر سسٹم، لوڈر گاڑی اور گھریلو سامان کو ٹارگٹ کیا گیا جس سے 5 خاندان متاثر ہو چکے ہیں۔ ذرائع کے مطابق ان جیسے واقعات کی تفتیش جاری تھی کہ ایک اور کیس سامنے آ گیا۔
ذرائع کے مطابق مدعی یاسین ولد حبیب اللہ سکنہ تنگی چارسدہ جو بمقام درنگ امبار مہمند میں بطور منشی ڈیوٹی سرانجام دیتا ہے کے موبائل فون نمبر پر 03083543685 سے دھمکی آمیز میسج بذریعہ واٹس ایپ آیا اور وائس کالز بھی موصول ہوئیں۔ واقعہ کی بابت درج مقدمہ پر کارروائی ایس پی سی ٹی ڈی مردان ریجن 2 قاضی عصمت خان کی زیر نگرانی شروع ہوئِی۔
ذرائع کے مطابق تکنیکی بنیادوں پر ملزمان تک رسائی حاصل کرکے معلوم ہوا کہ ملزم فیض اللہ ولد حیات اللہ سکنہ امبار مہمند جوکہ کمانڈر بلال ٹی ٹی پی کا چچا زاد ہے اس کو گرفتار کرکے اس کے موبائل فونز کی فورنزک کرنے پر معلوم ہوا کہ 10 واٹس ایپ گروپس جو کہ افغانستان سے آپریٹ ہو رہے ہیں اس میں موجود ہیں۔ اس میں واٹس ایپ کے وائس میسج میں رقم کا مطالبہ ٹی ٹی پی کی طرف سے بھی موجود ہے اور کمانڈر بلال کا ذاتی افغانی نمبر بھی سیو ہے اور رابطے بھی موجود ہیں۔
ذرائع کے مطابق کمانڈر بلال کے ذریعے لوگوں کو دھمکی آمیز کالز کر کے رقم وصول کی جاتی ہے۔ ملزم فیض اللہ کمانڈر بلال اور کمانڈر قاسم کے لئے سہولت کاری اور معلومات فراہم کر رہا ہے جس کی نشاندہی پر ملزم سعید اللہ ولد زر عالم خان سکنہ افغانستان حال گرین ٹاؤن لاہو ر جو ملزم بالا کا قریبی ساتھی ہے، جو جعلی موبائل سم وغیرہ مہیا کرتا ہے اور فیض اللہ کے ساتھ شریک جرم ہے کو گرفتار کر لیا گیا ہے۔ ذرائع کے مطابق فیض اللہ کے موبائل سے برآمد 364 افغانی نمبرات جبکہ 71 پاکستانی نمبرات جو کہ ٹی ٹی پی کے واٹس ایپ گروپس میں ایڈ ہیں کی تصدیق جاری ہے۔ اس دوران افغانی نمبرز کراس میچ ہونے پر معلوم ہوا کہ متذکرہ نمبرز سے قبل ازیں تھریٹ کالز موصول ہو کر رپورٹ ہو چکی ہیں جن کی بھی تفتیش جاری ہے۔
