توانائی کی کھپت کم کریں، تمام سیاحتی مقامات کا حیاتیاتی تنوع اور ماحولیاتی توازن برقرار رکھنے کیلئے قابل ِتجدید توانائی سے فائدہ اٹھا کر پائیدار سیاحت کی مکمل صلاحیت کو بروئے کار لانا ہوگا۔صدد رر مملکت
ویب ڈیسک: یوم سیاحت کے عالمی دن کے حوالے سے صدر مملکت ڈاکٹر عارف علوی نے خصوصی پیغام جاری کرتے ہوئے کہا ہے کہ آج ہم خطے کی ترقی اور خوشحالی میں شعبہ سیاحت کے کردار اور صلاحیت کو بروئے کار لانے کے عزم کا اعادہ کرتے ہیں۔
صدر مملکت نے کہا کہ پاکستان دنیا کے چند دلکش ترین سیاحتی مقامات کا حامل ملک ہے، پاکستان بلند ترین پہاڑی چوٹیوں، شاندار ساحلی پٹی، خوبصورت جھیلوں، سرسبز و شاداب وادیوں، قدیم تہذیبوں اور بھرپور ثقافتی ورثے کی سرزمین ہے۔
ڈاکٹر عارف علوی کا یوم سیاحت کے حوالے سے مزید کہنا تھا کہ ہر سال 27 ستمبر کو اقوام متحدہ کی عالمی تنظیم برائے سیاحت کے زیراہتمام عالمی یوم سیاحت منایا جاتا ہے، اس دن کو منانے کا مقصد شعبہ سیاحت کی اہمیت اور ہمارے معاشرے پر اس کے اثرات کے بارے میں شعور اجاگر کرنا ہے۔
صدر مملکت کا کہنا تھا کہ اس سال کے یومِ سیاحت کا موضوع "سیاحت اور ماحول دوست سرمایہ کاری” ہے۔
عالمی یوم سیاحت کے حوالے سے صدر مملکت نے کہا ہے کہ اس سال کے یوم سیاحت کا مقصد سیاحت کے فروغ اور پائیدار ترقی کیلئے ماحول دوست سرمایہ کاری کے امکانات کی نشاندہی کرنا ہے، اقوامِ متحدہ کی عالمی تنظیم برائے سیاحت عالمی یوم سیاحت کے موقع پر انسانیت، کرہ ارض اور خوشحالی کیلئے مزید اور بہتر سرمایہ کاری کی ضرورت اجاگر کرتی ہے۔
صدر مملکت نے کہا کہ یہی وقت ہے کہ ہم اقتصادی ترقی اور پیداواری صلاحیت بڑھانے کیلئے روایتی سرمایہ کاری کے علاوہ جدید اور غیر روایتی حل بھی اپنائیں.
انہوں نے کہا کہ آج موسمیاتی تبدیلیوں کے باعث پیدا ہونے والی ہنگامی صورتحال کی وجہ سے کئی سیاحتی مقامات اور سیاحت پر انحصار کرنے والی آبادیوں اور معیشتوں کو بقاء کے خطرات لاحق ہیں، موسمیاتی تبدیلیوں سے شدید متاثر بہت سے ترقی پذیر دیگر ممالک کو سرمایہ کاری کی کمی اور مہنگائی کے بحران کا بھی سامنا ہے۔
ان کا کہا تھا کہ سیاحت کے پائیدار فروغ اور محفوظ مستقبل کیلئے ہمیں نئی حدود اور طویل المدتی منصوبہ بندی کی اشد ضرورت ہے۔
صدر مملکت نے کہا کہ اس سال کے دن کا مقصد نجی شعبے کو اس بات کی ترغیب دلانا ہے کہ وہ صفر کاربن اخراج کے طریقے اپنائیں، توانائی کی کھپت کم کریں، تمام سیاحتی مقامات کا حیاتیاتی تنوع اور ماحولیاتی توازن برقرار رکھنے کیلئے قابل ِتجدید توانائی سے فائدہ اٹھا کر پائیدار سیاحت کی مکمل صلاحیت کو بروئے کار لانا ہوگا۔
انہوں نے مزید کہا کہ آئیے ہم سب ایک بہتر اور پائیدار مستقبل کیلئے ماحول دوست سرمایہ کاری پر توجہ دے کر پائیدار سیاحت کے امکانات بروئے کار لانے کیلئے مل کر کام کریں۔
