ویب ڈیسک: انسداد دہشتگردی عدالت نے جناح ہاؤس کیس میں اسد عمر، علیمہ اور عظمیٰ خان کی عبوری ضمانتوں میں توسیع کر دی۔ لاہور کی انسداد دہشتگردی عدالت میں جناح ہاؤس جلاؤ گھیراؤ کیس کی سماعت ہوئی جس میں اسد عمر، علیمہ اور عظمیٰ خان عدالت میں پیش ہوئے۔ دوران سماعت تفتیشی افسر نے عدالت کو بتایا کہ ملزمان جناح ہاؤس کیس میں قصوروار پائے گئے ہیں اور جے آئی ٹی نے تینوں ملزمان کو گناہگار لکھا ہے۔
تفتیشی افسر نے کہا کہ ہمارے پاس کچھ ایسے گواہ اور ان کے بیانات ہیں جن سے تینوں کی جائے وقوعہ پر موجودگی ثابت ہے اس لیے تینوں کی گرفتاری مطلوب ہے۔ ملزمان کے وکیل نے تفتیشی افسر کے بیان پر کہا کہ بیان ہمیں بھی دکھائے جائیں اس پر تفتیشی افسر نے کہا کہ ہم بیان دکھانے کو تیار ہیں۔
بعد ازاں عدالت نے پولیس کی جانب سے اسد عمر، علیمہ اور عظمیٰ خان کی گرفتاری کی استدعا مسترد کرتے ہوئے تینوں کی عبوری ضمانت میں 16 اکتوبر تک توسیع کردی۔ عدالت نے کیس کی مزید سماعت بھی 16 اکتوبر تک ملتوی کردی۔
