ویب ڈیسک: پاکستان سے غیر قانونی مقیم غیر ملکیوں کے انخلاء کے بارے میں ترجمان دفتر خارجہ ممتاز زہرہ بلوچ نے کہا ہے کہ غیر قانونی مقیم غیر ملکیوں کے انخلا کا فیصلہ خودمختار ملکی قوانین اور عالمی اصولوں کے مطابق ہے۔ ان کا کہنا تھا کہ یو این ایچ سی آر نے پاکستانی حکام سے اپیل کی تھی کہ یکم نومبر کی ڈیڈ لائن ختم ہونے کے بعد ملک بدری کا فیصلہ معطل کیا جائے۔
ترجمان دفتر خارجہ ممتاز زہرہ بلوچ نے کہا ہے کہ ہم نے اقوام متحدہ کے ہائی کمشنر برائے انسانی حقوق کے دفتر کے بیان کا مشاہدہ کیا ہے، غیر قانونی مقیم غیر ملکیوں کی وطن واپسی کا منصوبہ (آئی ایف آر پی) ان کی قومیت اور اصل ملک سے قطع نظر، پاکستان میں غیر قانونی مقیم تمام غیر ملکیوں پر لاگو ہوتا ہے۔
ترجمان دفتر خارجہ کا مزید کہنا تھا کہ پاکستان میں قانونی طور پر مقیم یا رجسٹرڈ تمام غیر ملکی شہری اس منصوبے کے دائرہ کار سے باہر ہیں، پاکستان نے لاکھوں افغانوں کی 40 سال تک میزبانی کی ہے۔
انہوں نے بین الاقوامی برادری پر زور دیا کہ وہ ترجیحی معاملے کے طور پر پائیدار حل کے سلسلے میں مہاجرین کے مسئلہ سے نمٹنے کے لیے اجتماعی کوششوں کو تیز کریں۔
