ویب ڈیسک: بلبل صحرا، سروں کی ملکہ معروف لوک گلوکارہ ریشماں کو مداحوں سے بچھڑے 10 برس بیت گئے۔
معروف لوک گلوکارہ 1947ء میں راجستھان میں پیدا ہوئیں، برصغیر کی تقسیم کے بعد ان کا خاندان ہجرت کر کے کراچی منتقل ہوگیا۔
خانہ بدوش خاندان سے تعلق رکھنے والی ریشماں نے کم عمری میں ہی صوفیانہ کلام گانا شروع کر دیا، 12 سال کی عمر میں ریشماں کو ریڈیو پاکستان پر گانے کا موقع ملا، یوں ریشماں نے لوک گلوکارہ کے سفر کا آغاز کیا۔
60 کی دہائی میں پاکستان ٹیلی ویژن کی بنیاد رکھی گئی تو ریشماں نے ٹی وی کیلئے گانا شروع کر دیا انہوں نے پاکستانی فلموں کیلئے متعدد گیت گائے، ان کی مقبولیت سرحد پار بھی پہنچی اور بالی ووڈ میں یہ سحر انگیز آواز گونجی۔
لوک گلوکارہ ریشماں نے اپنے منفرد انداز سے دنیا بھر میں نام پیدا کیا۔ یاد رہے کہ ریشماں کو ستارہ امتیاز اور لیجنڈز آف پاکستان کے اعزازات سے بھی نوازا گیا، لوک گلوکارہ 3 نومبر 2013ء میں گلے کے سرطان کے باعث انتقال کر گئیں۔
