ویب ڈیسک: افغانی باشندے اپنے وطن پہنچنے پر مشکلات کا شکار ہو گئے۔ یاد رہے کہ افغان باشندوں کے پاکستان چھوڑنے کی ڈیڈ لائن ختم ہونے پر وطن واپسی کا سلسلہ جاری ہے۔
افغان باشندوں نے اپنے وطن پہنچنے پر افغان طالبان کا ان کے ساتھ پیش آنے والے برُے سلوک کا تذکرہ کیا۔ اس موقع پر پاکستان سے بے دخل ہونے والے افغان مہاجرین نے وطن پہنچنے پر اپنی شکایات کا اظہار کرتے ہوئے کہا کہ طالبان اہلکاروں نے ہمارے رشتے داروں سے نقد رقم اور موبائل چھینے ہیں۔
افغان مہاجرین کا کہنا تھا کہ ہماری ماوں اور بہنوں کی بے عزتی کی گئی، اس سے اچھا تھا کہ ہم پاکستان کی جیل میں ہوتے، افغانستان میں ہماری جو بے عزتی ہوئی ہے کم از کم وہاں کے جیلوں میں یہ تو نہ ہوتی۔
پاکستان سے اپنے وطن جانے والے افغانیوں کا کہنا تھا کہ یہاں ہمیں کسی قسم کی سہولیات فراہم نہیں کی گئی۔ تین دن ہو چکے ہمیں آئے ہوئے، کھانے پینے کو کچھ نہیں دیا گیا حتی کے یہاں کوئی باتھ روم تک نہیں، ہم کھلے آسمان تلے پڑے ہیں۔ یاد رہے کہ افغانی باشندے وطن پہنچنے پر شدید مشکلات کا شکار ہو گئے ہیں.
