ویب ڈیسک: غلام سرورخان نے استحکام پاکستان پارٹی میں شمولیت کا باقاعدہ اعلان کر دیا، اس موقع پر ان کا کہنا تھا کہ ہم سب مل کر پاکستان کو مضبوط اور خوشحال بنائیں گے۔ ٹیکسلا میں منعقدہ جلسہ سے خطاب کرتے ہوئے سابق وفاقی وزیر کا کہنا تھا کہ ہم ایک گروپ کی صورت میں پی ٹی آئی میں شامل ہوئے تھے، جہانگیرترین اور عبدالعلیم کا بہت کردار رہا پی ٹی آئی کو اقتدار اور چیئرمین پی ٹی آئی کو وزیراعظم بنانے میں۔
انہوں نے کہا کہ 9 مئی کے واقعہ نے پاکستان کو جھنجوڑ کر رکھ دیا، انہوں نے سانحہ 9 مئی کی مذمت کرتے ہوئے کہا کہ ہم نے پاکستان کو کچھ نہیں پاکستان نے ہمیں بہت کچھ دیا، اب جواب میں ہم نے پاکستان کو پاکستانیت دینی ہے۔
غلام سرور خان نے مزید کہا کہ ہمارا منشور سب سے پہلے مضبوط، خوشحال پاکستان ہے، پاکستان کے روشن مستقبل کا بیڑا استحکام پاکستان پارٹی نے اٹھایا ہے۔
