ویب ڈیسک: غزہ میں کشت و خون کا سلسلہ جاری، 45 روز سے جاری اسرائیلی بربریت میں اب تک 5500 بچوں سمیت 13 ہزار فلسطینی شہید ہو چکے ہیں۔ تفصیلات کے مطابق غزہ میں اسرائیلی جارحیت 45 ویں روز بھی جاری ہے۔ بین الاقوامی جنگی قوانین پس پشت ڈالتے ہوئے اسرائیلی افواج نے بلاتفریق حملوں میں سویلین رہائشی علاقوں، پناہ گزین کیمپوں، سکولوں، ہسپتالوں اور عبادت گاہوں تک کو بھی نہیں بخشا۔
صیہونی افواج کی جانب سے جاری حملوں میں غزہ کی 4 مساجد کو شہید کردیا گیا جبکہ 7 اکتوبر سے تاحال جاری اسرائیلی حملوں میں شہید فلسطینیوں کی تعداد13 ہزار ہوگئی ہے۔
اسرائیلی افواج نے شمالی غزہ کی مسجد القسام، مسجد الخلیفہ، مسجد حیفہ اور مسجد الامین محمد کو شہید کر دیا جبکہ جبالیہ کیمپ کے اقامتی بلاکوں پر بھی گولا باری کی گئی۔
اسرائیلی فوج نے گزشتہ رات کمال عدوان ہسپتال پر بھی بم گرایا تھا جس سے نومولود بچوں کا انتہائی نگہداشت کا وارڈ آئی سی یو تباہ اور ایک شیرخوار شہید ہوگیا تھا۔
اسرائیلی فورسز کی جانب سے غزہ شہر میں حماس کے ٹھکانے تباہ کرنے، اسلحہ برآمد کرنے اور حماس عہدیداروں کے گھروں پر چھاپوں کا بھی دعویٰ کیا گیا ہے۔
الشفاء ہسپتال سے 31 نومولود بچوں کو نکال کر جنوبی غزہ میں امارات کے فیلڈ ہسپتال پہنچا دیا گیا تاہم 250 سے زیادہ مریض اور 25 ہیلتھ ورکرز اب بھی ہسپتال میں محصور ہیں۔ دوسری جانب مغربی کنارے میں اسرائیلی فوج کی کارروائیاں جاری ہیں، گزشتہ دو روز میں مزید 50 فلسطینی شہید کر دیے گئے۔
