ویب ڈیسک: پشاور میں بڑھتی دھند کے باعث موٹر وے پشاور سے رشکئی روٹ ہر قسم کی ٹریفک کیلئے بند کر دیا گیا ہے۔ ذرائع کے مطابق دھند کے باعث حد نگاہ انتہائی کم رہ گئِی ہے۔
ترجمان موٹروے پولیس کا کہنا ہے کہ موٹر وے بند کرنے کا مقصد حادثات سے بچاؤ اور موٹر وے استعمال کرنے والوں کی جان و مال کی حفاظت ہے۔ اس کے علاوہ شہریوں سے درخواست ہے کہ دھند کے اوقات میں غیر ضروری سفر سے گریز کریں۔
ترجمان موٹروے پولیس کی جانب سے ہدایت کی گئی ہے کہ عوام اپنا سفر دن کی روشنی میں مکمل کر کے دھند کے اغاز سے پہلے اپنی منزل مقصود تک پہنچ جائیں جبکہ گاڑیوں میں فوگ لائٹس کا استعمال کریں۔
ذرائع کے مطابق تیز رفتاری سے پرہیز کرنے سمیت لوگوں کو اگلی گاڑی سے مناسب فاصلہ معمول سے زیادہ رکھنا ہوگا۔ اس کے علاوہ سفر شروع کرنے سے پہلے موٹر وے پولیس کی ہیلپ لائن 130 سے معلومات حاصل کی جا سکتی ہیں۔
موٹر وے پولیس کا اس حوالے سے مزید کہنا ہے کہ نیشنل ہائی ویز اینڈ موٹر وے پولیس کے افیشل سوشل میڈیا اکاؤنٹ سے بھی تازہ ترین معلومات حاصل کی جا سکتی ہیں۔
