ویب ڈیسک: اسرائیلی بمباری کے نتیجے میں لبنان میں شہداء کی تعداد 600 تک جا پہنچی جبکہ 1835افراد زخمی ہو گئے۔
لبنان کی وزرات صحت کے مطابق اسرائیلی حملوں میں جاں بحق ہونے والوں میں 38بچے اور 58خواتین شامل ہیں۔
لبنانی مزاحمتی تنظیم حزب اللہ کا کہنا تھا کہ بیروت پر اسرائیلی حملے میں حزب اللہ کے سینئر کمانڈر علی کرکی محفوظ رہے۔
لبنان پر اسرائیلی حملوں کے جواب میں کارروائی کرتے ہوئے حزب اللہ نے بھی اسرائیل پر 200کے قریب راکٹ داغ دیے۔
حزب اللہ کی جانب سے شمالی علاقے کی اسرائیلی فوجی چوکیوں اور حیفہ شہر میں رافیل ڈیفنس انڈسٹری کمپلیکس کو نشانہ بنایا گیا۔
دوسری جانب لبنان اور اسرائیل کے درمیان کشیدگی میں اضافے کے بعد امریکا نے مشرق وسطی میں موجود 40 ہزار امریکی فوجیوں کی تعداد میں اضافے کا فیصلہ کرلیا ہے۔
ادھر لبنان پر اسرائیلی حملوں کے بعد مصر نے آج سے بیروت آنے اور جانے والی پروازیں منسوخ کر دیں۔
خیال رہے کہ گزشتہ روز اسرائیلی جنگی طیاروں نے صرف آدھے گھنٹے میں لبنان کے شہر نبطیہ پر 80 فضائی حملے کیے جس میں حزب اللہ کے اہداف پر حملوں کا دعوی کیا گیا ہے۔
رپورٹس کے مطابق اسرائیل کی جانب سے کیا گیا حملہ غزہ جنگ شروع ہونے کے بعد اب تک کا سب سے بڑا فضائی حملہ تھا جس میں اسرائیل نے لبنان کے شمالی اور جنوبی حصے پر ایک وقت میں حملہ کیا۔
اسرائیلی بمباری کے نتیجے میں لبنان میں شہداء کی تعداد 600 تک جا پہنچی جبکہ 1835افراد زخمی ہو گئے، ان کے علاوہ 38بچے اور 58خواتین شامل ہیں۔
صیہونی افواج نے غزہ کے بعد لبنان کو تختہ مشق بنا دیا اور یہاں بھی بارود کی بارش کر دی ، اس دوران شہری علاقوں کو سب سے پہلے ٹارگٹ بنایا جا رہا ہے جس سے زیادہ تعداد میں جانی نقصان ہوا.
