ویب ڈیسک: بانی پی ٹی آئی عمران خان کی اہلیہ بشریٰ بی بی پشاور پہنچ گئیں، ان کی رہائش کیلئے تمام تر انتظامات مکمل کر لئے گئے ہیں۔
تفصیلات کے مطابق بانی پی ٹی آئی کی اہلیہ اور سابق خاتون اول بشریٰ بی بی پشاور پہنچ گئیں، پارٹی ذرائع کے مطابق وزیر اعلی ہاوس کی انیکسی میں سابق خاتون اول کچھ وقت کے لیے رہائش پزیر ہونگی۔
اس حوالے سے وزیر اعلی ہاؤس زرائع کی جانب سے بتایا گیا ہے کہ وزیراعلی ہاؤس میں بشریٰ بی بی کی رہائش کیلئے تمام تر انتظامات مکمل کئے جا چکے ہیں۔ بشریٰ بی بی تین روز قبل بانی پی ٹی ائی کی ہدایت پر لاہور پہنچی تھی۔
سابق خاتون اول بشریٰ بی بی زمان پارک سے پشاور روانہ ہو گئیں، بانی پی ٹی آئی عمران خان کی اہلیہ قافلے کے ہمراہ وزیراعلیٰ ہاؤس پشاور جائیں گی۔ ذرائع کے مطابق اڈیالہ جیل میں 190ملین پاؤنڈ کیس کی سماعت کے بعد سابق خاتون اول راولپنڈی سے رات گئے زمان پارک لاہور والی رہائشگاہ پہنچیں تو پنجاب پولیس کی بھاری نفری نے بھی وہاں ڈیرے ڈال دیئے۔
ذرائع نے بتایا ہے کہ پولیس رات گئے قیدیوں کی وین اور واٹر کینن کے ہمراہ زمان پارک پہنچی اور زمان پارک کے اطراف پر بیریئر لگا کر ہر آنے جانے والے پر نظریں جما لیں۔ اس صورتحال میں آج سابق خاتون اول بشریٰ بی بی زمان پارک سے پشاور روانہ ہو گئیں، زمان پارک سے روانگی کے وقت ان کے ہمراہ سیکیورٹی کی گاڑیاں بھی موجود تھیں۔
