ویب ڈیسک: امریکا میں ہونے والے عام الیکشن میں کئی امریکن پاکستانی سیاستدان بھی انتخابی کے میدان میں موجود ہیں۔
تفصیلات کے مطابق امریکہ میں ہونے والے انتخابات میں کئی پاکستانی سیاستدان بھی حصہ لے رہے ہیں جن میں ڈیموکریٹ ٹکٹ پر ٹیکساس کی ریاستی اسمبلی کیلئے امیدوار سلیمان لالانی اور سلمان بھوجانی کو مضبوط امیدوار قرار دیا جا رہا ہے۔
اسی طرح مشی گن سے عائشہ فاروقی، پینسلوینیا میں ڈیموکریٹ ٹکٹ پر مریم صبیح امیدوار ہیں جبکہ نیویارک میں ریپبلکن ٹکٹ پر عامر سلطان انتخابات میں حصہ لے رہے ہیں۔
کانگریس کیلئے واحد امریکن پاکستانی امیدوار ایرن بشیر کا پینسلوینیا میں مقابلہ ہوگا۔
واضح رہے کہ امریکا میں 47 ویں صدر کے انتخاب کیلئے تمام ریاستوں میں پولنگ کا عمل جاری ہے، ریپبلکن ٹرمپ اور ڈیموکریٹ کاملا میں کانٹے کا مقابلہ متوقع ہے۔
عام انتخاب میں ووٹرز ایوان نمائندگان کے 435 ارکان اور 34 سینیٹرز بھی منتخب کریں گے۔
7 کروڑ 79 لاکھ افراد 5 نومبر کے باقاعدہ الیکشن سے پہلے ووٹ ڈال چکے، صدارت کے عہدے پر کسی بھی امیدوار کو جیت کیلئے کل 538 میں سے کم از کم 270 الیکٹورل ووٹ درکار ہیں،7 سوئنگ اسٹیٹس کسی امیدوار کی کامیابی میں فیصلہ کن ہوں گی۔
