ویب ڈیسک: اڈیالہ جیل کے باہر پی ٹی آئی رہنما علی محمد خان نے میڈیا نمائندگان سے بات چیت کرتے ہوئے کہا ہے کہ بانی پی ٹی آئی عمران خان نے ٹرمپ کامیابی پر خوشی کا اظہار کیا اور کہا کہ بائیڈن دور کا منفی رویہ ٹرمپ کے آنے سے نیوٹرل ہو جائیگا۔
علی محمد خان نے کہا کہ بانی پی ٹی آئی نے انہیں بتایا کہ جو بائیڈن کے دور میں مداخلت ہوئی، ٹرمپ کے آنے سے اس میں فرق تو پڑے گا۔ ان کا کہنا تھا کہ عمران خان نے بتایا کہ جب میں وزیراعظم تھا تو میرا ٹرمپ سے رابطہ رہتا تھا اور ایک اچھا دوستانہ تعلق تھا، اگر وہ لوگ آتے ہیں جن سے اچھا تعلق رہا ہے تو یہ اچھی پیش رفت ہے۔
علی محمد خان نے مزید بتایا کہ بانی پی ٹی آئی نے واضح کر دیا ہے کہ آگے بڑھنے کا راستہ صرف احتجاج ہے۔ ممبر قومی اسمبلی نے کہا کہ بانی پی ٹی آئی کی رہائی کا معاملہ پاکستان میں ہی مکمل ہوگا، امریکا سے نہیں۔
دوسری جانب صحافیوں سے گفتگو میں ان کا کہنا تھا کہ بانی پی ٹی آئی کا کہنا تھا کہ حالیہ قانون سازی سے سپریم کورٹ کو کمزور کیا گیا ہے، تحریک انصاف نے ملک کی بہتری کیلئے قانون سازی کی ہمیشہ حمایت کی ہے، آئینی ترمیم پر اپوزیشن سے حکومت نے رابطہ کیوں نہیں کیا۔
پی ٹی آئی رہنما نے میڈیا کو بتایا کہ عمران خان نے ڈونلڈ ٹرمپ کی کامیابی پر خوشی کا اظہار کرتے ہوئے کہا کہ بائیڈن دور کا منفی رویہ ٹرمپ کے آنے سے نیوٹرل ہو جائیگا۔
