ویب ڈیسک: بیرون ملک موجود پاکستانی گروپ کی جانب سے پاکستان انٹرنیشنل ائیرلائن (پی آئی اے)کو سوا کھرب روپے سے زائد میں خریدنے کی پیشکش موصول ہو گئی ہے ۔
النہانگ گروپ نے پی آئی اے کو سوا کھرب روپے سے زائد میں خریدنے کے لیے وزیر نجکاری، وزیر ہوا بازی اور وزیر دفاع سمیت دیگر متعلقہ حکام کو ای میل ارسال کر دی۔
قومی ائیر لائن خریدنے کے خواہش مند گروپ نے پی آئی اے کے 250ارب روپے واجبات ادا کرنے کی بھی پیشکش کی۔
نجکاری کے حوالے سے گروپ نے پی آئی اے ملازمین کی چھانٹی نہ کرنے، مرحلہ وار تنخواہوں میں 30 سے 100 فیصد اضافے کی پیشکش بھی کی ہے۔
قومی ائیر لائن کے لئے بہترین بزنس پلان سمیت فلیٹ میں جدید طیاروں کی شمولیت کی بھی یقین دہانی کروائی گئی ہے۔
پیشکش میں قومی ائیر لائن کو دیگر ائیر لائنز کے لئے انجینئرنگ اور مینٹینس حب بنانے کا آپشن بھی شامل ہے۔
