ویب ڈیسک:خیبر پختونخوا کی تاریخ میں اپنی نوعیت کی پہلی تین روزہ ثقافتی میلہ ہارس اینڈ کیٹل شو اپنی تمام تر رعنائیوں کے ساتھ اختتام پذیر ہوگئی ۔
اختتامی تقریب کے مہمان خصوصی صوبائی وزیر کھیل و امور نوجوانان سید فخر جہان اور وزیر برائے پبلک ہیلتھ پختون یار نے جیتنے والے کھلاڑیوں میں ٹرافیاں اور کیش انعامات تقسیم کئے ۔
ممبر صوبائی اسمبلی فیصل امین خان گنڈا پور ، سیکرٹری سپورٹس مطیع اللہ خان ، ڈی جی سپورٹس عبدالناصر،ڈائریکٹر ضم اضلاع رضی اللہ ، ڈائریکٹر آپریشن نعمت اللہ ڈپٹی ڈائریکٹر جمشید بلوچ سمیت دیگر بھی موجود تھے ۔
ڈائریکٹریٹ جنرل آف سپورٹس خیبرپختونخوا کے زیراہتمام تین روزہ ثقافتی میلہ ہارس اینڈ کیٹل شو کے آخری روز نیزہ بازی کے سنسنی خیز اور دلچسپ مقابلے منعقد ہوئے ۔
تین روزہ پارس اینڈ کیٹل شو میں گھوڑے اور جانوروں کے ریس کے علاوہ کبوتر ریس، روایتی کھیل، روایتی موسیقی، آرٹ نمائش، روایتی رقص، فیملی فیسٹیول، مشاعرہ، ڈاگ شو اور ونٹیج کار شو کا انعقاد کیا گیانیزہ بازی میں ایک ہزار گھوڑوں نے حصہ لیا ۔
روایتی کھیلوں میں کبڈی، دنگل، اونٹ ریس، اونٹ دانس، ڈاگ ریس سمیت دیگر 16 مقابلے منعقد کئے گئے،ہارس اینڈ کیٹل شو ثقافتی میلہ شیر خان اسٹیڈیم پشاورمیںتینوں دن عروج پررہا ثقافتی میوزیکل شونے خواتین، بچوں اورجوانوں کوخوب محظوظ کیا۔
ثقافتی شومیں زرسانگہ،ذیشان غزنوی اورجیم بینڈ ،خماریارن بینڈ،صوفیا سمیت دیگر فنکاروںنے اپنے دلکش پرفارمنس سے زبردست سماں باندھ دیاتھااورشائقین میوزک خوب محظوظ ہوئے ،
اس دوران مختلف نمائشی اور کھانے پینے کے سٹالز بھی لوگوں کی توجہ حاصل کرنے میں کامیاب رہے جبکہ رات گئے میوزیکل شو میں معروف گلوکار وں نے میلے کے اختتامی لمحات کو چار چاند لگا دئیے۔
اختتامی تقریب سے خطاب کرتے ہوئے صوبائی وزیر کھیل سید فخر جہان کا کہنا تھا کہ ہارس اینڈ کیٹل شو اپنی نوعیت کا اس صوبے میں پہلا اہم ایونٹ ہے جو موجودہ صوبائی حکومت نے منعقد کیا ہے۔
انہوں نے کہا کہ وزیر اعلیٰ خیبر پختونخوا کی سرپرستی میں ہم صوبے میں کھیلوں کے فروغ کے سلسلے میں نمایاں اقدامات اٹھا رہے ہیں جسکا مقصد یہاں پر ایک پر امن اور صحت مند معاشرے کی تشکیل کیلئے کوششیں کرنی ہیں۔
