ویب ڈیسک: پاکستان میں ہونے والے چیمپئنز ٹرافی کیلئَے تیاریاں حتمی مرحلہ میں داخل ہو گئی ہیں جبکہ آئی سی سی کی جانب سے ایونٹ کی ٹرافی پاکستان پہنچ گئی ہے۔ اس سلسلے میں تمام قیاس آرائیاں بھی دم توڑ گئی ہیں۔
آئی سی سی چیمپئنز ٹرافی کے شیڈول کا اعلان تو نہیں کیا جا سکا لیکن انٹرنیشنل کرکٹ کونسل نے ایونٹ کی ٹرافی دبئی سے اسلام اباد پہنچا دی، ٹرافی پاکستان پہنچنے کے بعد ٹرافی ٹور کا آغاز ہفتے کے روز سے کیا جائے گا۔ آئی سی سی کے شیڈول کے مطابق 16نومبر سے شروع ہونے والا چیمپئنز ٹرافی ٹور 24 نومبر تک جاری رہے گا، ٹرافی ٹور کا آغاز ہفتے کو اسلام آباد سے ہوگا، ٹرافی کو سکردو کے ٹو بیس کیمپ بھی لے جایا جائے گا۔
آئِی سی سی چمپئنز ٹرافی کے ٹور شیڈول میں مری، ہنزہ، مظفر آباد کے علاوہ دیگر شہر بھی شامل ہیں۔ یہ پہلا موقع ہے کہ آئی سی سی چیمپئنز ٹرافی کے شیڈول کے اعلان کے بغیر ہی ٹرافی ٹور شروع ہو گا۔ انٹرنیشنل کرکٹ کونسل کی جانب سے میگ ایانٹ کے آغاز سے 4 ماہ پہلے شیڈول کا اعلان کرتی ہے، جیسے ٹی20 ورلڈ کپ 2024 کے شیڈول کا اعلان 4 ماہ پہلے اور ون ڈے ورلڈکپ 2023 کے شیڈول کا اعلان 3 ماہ پہلے کر دیا گیا تھا۔
آئی سی سی چیمپئنز ٹرافی 19 فروری سے 9 مارچ تک پاکستان میں شیڈولڈ ہے۔ اس کے شیڈول کا اعلان آئی سی سی نے 11 نومبر کو لاہور میں کرنا تھا لیکن یہ تقریب منسوخ کر دی گئی تھی۔ بھارتی انکار کے باعث آئی سی سی ٹرافی کے شیڈول کا اعلان نہیں کر پا رہی، چیمپئنز ٹرافی 2024 میں بھارت کے تمام میچز لاہور میں منعقد ہونا تھے۔ اب ان کے انکار کے بعد مسائل جنم لینے لگے ہیں، تاہم ایونٹ کی ٹرافی پاکستان پہنچ گئی۔
