ویب ڈیسک: خیبرختونخوا کے دو اضلاع بنوں اور خیبر میں سیکیورٹی فورسز کے آپریشن کے دوران 8دہشتگرد ہلاک جبکہ کیپٹن سمیت 2جوان شہید ہو گئے۔
خیبر پختونخوا کے دو اضلاع میں 29 نومبر سے یکم دسمبر تک دو علیحدہ علیحدہ کارروائیوں میں سیکیورٹی فورسز نے 8 خوارج کو ہلاک کر دیا جبکہ ان کارروائیوں کے دوران کیپٹن سمیت دو فوجی جوان شہید ہو گئے۔ پاک فوج کے شعبہ تعلقات عامہ آئی ایس پی آر کے مطابق پہلی انٹیلی جنس بنیاد پر کارروائی بنوں کے علاقے بکا خیل میں کی گئی، جہاں خوارج کی موجودگی کی اطلاع پر سیکیورٹی فورسز نے خوارج کے ٹھکانے کو نشانہ بنایا۔
اس کارروائی کے دوران پانچ خوارج ہلاک اور 9 زخمی ہوئے تاہم اس دوران ضلع جھنگ سے تعلق رکھنے والے 29 سالہ سپاہی افتخار حسین نے بہادری سے لڑتے ہوئے جام شہادت نوش کیا۔
آئی ایس پی آر کے مطابق سیکورٹی فورسز کی دوسری کارروائی ضلع خیبر کے علاقے شاگئی میں کی گئی، جہاں تین خوارج کو ہلاک جبکہ دو کو گرفتار کیا گیا۔ اس دوران شدید فائرنگ کے تبادلے میں لاہور سے تعلق رکھنے والے 25 سالہ کیپٹن محمد زوہیب الدین نے اپنی ٹیم کی قیادت کرتے ہوئے جام شہادت نوش کیا۔
پاک فوج کے شعبہ تعلقات عامہ کے مطابق یہ خوارج متعدد دہشت گرد کارروائیوں میں ملوث تھے، خوارج نے سیکیورٹی فورسز اور معصوم شہریوں کو نشانہ بنایا۔ آئی ایس پی آر کے مطابق علاقے میں کسی بھی باقی ماندہ خوارج کو ختم کرنے کے لیے کلیئرنس آپریشن جاری ہے۔
آئی ایس پی آر کے مطابق پاکستان کی سیکیورٹی فورسز ملک سے دہشت گردی کے خاتمے کے لیے پرعزم ہیں، جبکہ ہمارے بہادر سپاہیوں کی قربانیاں اس عزم کو مزید مضبوط کرتی ہیں۔ خیبرپختونخوا میں ہونیے والی ان دونوں کارروائیوں کے دوران شہید ہونے والے فوجی جوانوں میں کیپٹن محمد زوہیب شہید کا تعلق لاہور سے ہے، جنہوں نے 3 سال سے زائد عرصے تک پاک فوج میں دفاع وطن کے فرائض سرانجام دیے۔ کیپٹن محمد زوہیب شہید نے سوگواران میں والدین چھوڑے ہیں۔
ان کارروائیوں میں سپاہی افتخار حسین شہید کا تعلق ضلع جھنگ سے ہے۔ 29 سالہ سپانی نے 8 سال تک پاک فوج میں دفاع وطن کی خدمات سرانجام دیں۔ سپاہی افتخار حسین شہید نے سوگواران میں اہلیہ، بیٹا اور بیٹی چھوڑے ہیں۔ یاد رہے کہ خیبرختونخوا کے دو اضلاع بنوں اور خیبر میں سیکیورٹی فورسز کے آپریشن کے دوران 8دہشتگرد ہلاک جبکہ کیپٹن سمیت 2جوان شہید ہو گئے۔
