ویب ڈیسک: ڈی چوک سے گرفتار 281ملزمان کو شناخت پریڈ پر سنٹرل جیل اڈیالہ دو خواتین کو جوڈیشل ریمانڈ پر جیل بھجوا دیا گیا ۔
انسداد دہشت گردی عدالت اسلام آباد نے ڈی چوک سے گرفتار 281ملزمان کو 14روز کے لیے شناخت پریڈ پر سینٹرل جیل اڈیالہ جبکہ دو خواتین کو جوڈیشل ریمانڈ پر جیل بھیجنے کا حکم دے دیا۔
ذرائع کے مطابق دو خواتین سمیت 283 ملزمان کو انسداد دہشت گردی عدالت کے جج طاہر عباس سپرا کے روبرو پیش کیا گیا جبکہ ملزمان کے وکیل انصر کیانی بھی عدالت میں پیش ہوئے۔
پولیس نے تمام ملزمان کے شناخت پریڈ کی استدعا کی جبکہ ملزمان کے وکیل انصر کیانی نے شناخت پریڈ کی مخالفت کی۔
وکیل انصر کیانی نے دلائل میں کہا کہ ملزمان کو چھ دنوں سے پولیس نے گرفتار کر رکھا ہے، شناخت پریڈ کے حوالے سے اسلام آباد ہائیکورٹ کا حکم نامہ بھی موجود ہے۔
واضح رہے کہ ملزمان کی تھانہ کوہسار کے دو مقدمات، تھانہ کراچی کمپنی، مارگلہ، سیکریٹریٹ اور ترنول میں گرفتاری ڈالی گئی تھی۔
